وزیر اعظم مودی نے بھوپال میں پانچ وندے بھارت ایکسپریس کو دکھائی ہری جھنڈی

بھوپال، 27 جون (انڈیا نیرٹیو)

 وزیر اعظم نریندر مودی نے منگل کو مدھیہ پردیش میں اپنے قیام کے دوران دارالحکومت بھوپال کے رانی کملا پتی اسٹیشن سے پانچ وندے بھارت ایکسپریس کو ہری جھنڈی دکھائی۔ دو وندے بھارت ٹرینیں بیک وقت رانی کملا پتی اسٹیشن سے اندور اور جبل پور کے لیے روانہ ہوئیں۔ اس کے علاوہ وزیر اعظم نے تین دیگر وندے بھارت ٹرینوں کو بھی ورچوئلی طور پر ہری جھنڈی دکھائی۔

اس سے پہلے وزیر اعظم مودی صبح 10:30 بجے فضائیہ کے خصوصی طیارے سے بھوپال کے راج بھوج ہوائی اڈے پر پہنچے۔ یہاں گورنر منگو بھائی پٹیل، وزیر اعلیٰ شیوراج سنگھ چوہان، وزیر داخلہ ڈاکٹر نروتم مشرا اور بی جے پی کے ریاستی صدر وی ڈی شرما نے ان کا استقبال کیا۔

اس کے بعد وزیر اعظم مودی بذریعہ سڑک رانی کملا پتی اسٹیشن پہنچے۔ یہاں وزیر اعظم کا استقبال وزیر اعلیٰ شیوراج سنگھ چوہان، ریاستی بی جے پی صدر وشنو دت شرما، طبی تعلیم وزیر وشواس سارنگ، مرکزی وزیر نریندر سنگھ تومر، جیوتی رادتیہ سندھیا نے کیا۔ وزیر اعظم مودی کے ساتھ ریلوے کے وزیر اشون ویشنو بھی موجود تھے۔

رانی کملا پتی اسٹیشن پر لوگوں کا استقبال قبول کرنے کے بعد، وزیر اعظم مودی پہلے وندے بھارت ایکسپریس کے اندر گئے اور ان طلبا سے ملاقات کی جو نئی شروع ہونے والی وندے بھارت ٹرین میں سفر کریں گے۔ ٹرین میں ساگر پبلک اسکول اور دیگر اسکولوں کے طلبا  نے وزیر اعظم کو اپنے ہاتھوں سے بنائی گئی پینٹنگز اور خاکے پیش کیے۔

وزیر اعظم کو اپنے درمیان پاکر اسٹیشن پر موجود لوگ خوش نظر آئے۔ وزیر اعظم اسکولی بچوں اور عملے کے ارکان سے بات چیت کے بعد وندے بھارت ایکسپریس سے باہر آئے۔ اس کے بعد انہوں نے وندے بھارت ٹرینوں کو جھنڈی دکھا کر روانہ کیا۔