بنگلورو،05جولائی (انڈیا نیرٹیو)

ہندوستان کی فٹ بال ٹیم نے کویت کو پنالٹی شوٹ آوٹ میں 5-4سے شکست دے کر ساوتھ ایشین فٹ بال فیڈریشن چیمپئن شپ (سیب )کے خطاب پر قبضہ کر لیا۔

گول کیپر گرپریت سنگھ سندھو نے فیصلہ کن پنالٹی کو بچانے کے لیے ڈائیولگائی اور اس طرح ہندوستان نے منگل کے روز بنگلورو کے کانتی ویرا اسٹیڈیم میں کھیلے گئے خطابی مقابلے میں  کویت کو شوٹ آؤٹ میں 5-4 سے شکست دے دی۔

ہندوستانی ٹیم نے  نویں بار سیف فٹ بال چیمپئن شپ کاخطاب  اپنے نام کیا ہے ۔ کھیل کے 120 منٹ تک دونوں ٹیمیں 1-1 سے برابری پر تھیں۔پنالٹی شوٹ آوٹ کے پانچ راونڈز کے بعد بھی اسکور 4-4تھا جس کے بعد سڈن ڈیتھ پر فیصلہ ہوا۔

مہیش نیروم نے اسکور کیا اور ہندوستان کے گول کیپر گرپریت سندھو نے ڈائیونگ کرتے ہوئے خالد حاجیہ کی شاٹ کو بچا کر ہندوستان کو جیت دلا دی۔

ریگولر ٹائم کے اندر، شعیب الخالدی نے 14ویں منٹ میں کویت کو برتری دلائی تھی، جب کہ لالیاں زوالا چھانگٹے نے 39ویں منٹ میں ہندوستان کے لئے  برابری کا گول کیا۔۔ دفاعی چیمپئن بھارت اور کویت نے بھی آخری گروپ میچ میں 1-1 سے ڈراکھیلا  تھا۔

ہندوستان نے دوسری بار پینلٹی شوٹ آؤٹ میں کامیابی حاصل کی ہے۔ اس سے قبل یکم جولائی کو سیمی فائنل میں بھی لبنان کو پنالٹی شوٹ آوٹ میں 4-2سے شکست دی تھی۔

ہندوستان کی طرف سے کپتان سنیل چھیتری، سندیش جھنگن، شبھاشیش بوس، چھانگٹے اور مہیش نے گول کیے جبکہ اودانتا سنگھ ہدف سے چوک گئے۔ شوٹ آوٹ سے قبل، کویت نے پہلے ہاف میں کئی مواقع پیدا کئے۔

اس کا نتیجہ 14ویں منٹ میں اس وقت نکلا جب مبارک الفانینی بائیں بازو سے عبداللہ البلوشی کے پاس گیا۔ البلوشی نے گیند الخالدی کے پاس کی جنہوں نے گول کرکے کویت کو برتری دلادی۔