تینتیس سال کے بعد جنوبی کشمیر میں دو ملٹی پرپز سنیما ہالوں کا افتتاح

 جموں و کشمیر کے لیفٹیننٹ گورنر منوج سنہا نے اتوار کو جنوبی کشمیر کے شوپیاں اور پلوامہ اضلاع میں دو سنیما ہالوں کا افتتاح کیا۔ مقامی لوگوں کا کہنا ہے کہ یہ ایک تاریخی دن ہے کہ پلوامہ اور شوپیاں میں ملٹی پرپز سنیما ہالز کا افتتاح کیا گیا۔

 اس دوران ایل جی سنہا نے ٹویٹ کیا ہے کہ یہ فلموں کی اسکریننگ، انفوٹینمنٹ اور نوجوانوں کی مہارت سے لے کر سہولیات فراہم کرتا ہے دریں اثنا ایک سرکاری   اہلکار نے کہا کہ سنیما ہالز کے کھلنے سے آنے والی نسلوں کو تفریح میسر آئے گی۔ پچھلے سال، حکومت نے خطے کی فلم انڈسٹری کی ترقی میں مدد کے لیے ایک نئی فلم پالیسی کا اعلان کیا، جس میں فلم ڈویلپمنٹ کونسل کی تشکیل اور بند سنیما ہالز کو دوبارہ کھولنا شامل ہے۔

  واضح رہے یہ سلسلہ وادی کشمیر میں تقریبا 33 سال کے بعد پھر سے شروع کیا گیا ہے، کیونکہ وادی کشمیر میں سال 1989 میں دہشت گردی کا دور شروع ہو کر کشمیر میں موجود سینما گھروں میں آگ لگا دی گئی تھی۔جسکے بعد کشمیر کے کئی سینما گھروں میں فورسز کو بٹھایا گیا تھا۔

اس دوران میڈیا سے بات کرتے ہوئے ایل جی سنہا نے کہا ہے کہ ہم نے فی الحال دو ملٹی پرپز سینما گھروں کو پلوامہ اور شوپیاں میں کھولا ہے اور آنے والے دنوں کے اندر ہر ضلع میں اس طرح کی سہولیات میسر رکھی جائیں گے، تاکہ نوجوان نسل ان سینما گھروں سے لطف اندوز ہو سکیں۔