جموں و کشمیر  کے ضلع راجوری میں’نوشہرہ لوک فیسٹیول‘کا انعقاد

راجوری، 25؍ دسمبر

جموں و کشمیر کے محکمہ سیاحت نے ہفتہ کے روز سیاحتی مقامات پر ’نوشہرہ فوک فیسٹیول‘ کے تحت متعدد سرگرمیوں کا اہتمام کیا۔ ایک سرکاری ریلیز کے مطابق، خاص طور پر جموں خطہ میں تشہیری مہموں کو جاری رکھتے ہوئے، ڈائریکٹوریٹ آف ٹورازم جموں نے ضلع انتظامیہ راجوری کے تعاون سے راجوری کے نوشہرہ میں بوائز ہائر سیکنڈری اسکول کے لان میں ’نوشہرہ فوک فیسٹیول‘ کا انعقاد کیا۔

اس تقریب کا افتتاح ڈپٹی کمشنر راجوری وکاس کنڈل نے ڈی ڈی سی چیئرپرسن نسیم لیاقت چودھری کے ساتھ کیا۔  ریلیز کے مطابق، تقریب کا آغاز ڈوگری فنکاروں کی پرفارمنس سے ہوا جس کے بعد گوجری اور پہاڑی رقص پیش کیا گیا۔

شو میں ستاروں کی پرفارمنس میں شعیب کانڈو، شیوم شیوا اور سندیپ برار کی شاندار گلوکاری شامل تھی۔ اس سے قبل دن میں ایڈیشنل ڈپٹی کمشنر نوشہرہ کرتار سنگھ، اسسٹنٹ ڈائریکٹر ٹورازم راجوری، امبیکا بالی؛  بی ڈی او نوشہرہ، خلیل رحمان اور ایس ڈی پی او نوشہرہ عادل احمد نے ڈاک بنگلہ نوشہرہ سے ‘ ہیرٹیج ٹور بس’ کو جھنڈی دکھا کر روانہ کیا جو بلاگرز اور مقامی سیاحوں کو منگلا ماتا، بریگیڈیئر عثمان وار میموریل، کھمبہ قلعہ، کھوری بابا کے مزار تک لے گئی اور تیمپلورد میں اختتام پذیر ہوئی۔

یہ بات قابل ذکر ہے کہ نوشہرہ  جموں وکشمیر کا ایک آف بیٹ سیاحتی مقام ہے اور سیاحوں کے لیے ایک انتہائی اہم سرحدی سیاحتی مقام ہے۔ اس موقع پر خطاب کرتے ہوئے ڈپٹی کمشنر راجوری نے راجوری ضلع کے بہترین سیاحتی مقامات کو فروغ دینے کی ضرورت پر زور دیا۔ انہوں نے نوشہرہ اور سندر بنی میں اس طرح کی تقریبات کے انعقاد میں محکمہ سیاحت کی کوششوں کو سراہا جہاں مقامی لوگوں کی شرکت بھی اچھی رہی۔