فضائیہ نے 4 بلین ڈالر کے ساتھ فائٹرفلیٹ کو پانچویں جنریشن کے’سپر سخوئی‘میں اپ گریڈ کرنے کا کیا اعلان

ہندوستانی فضائیہ کو اپنے سخوئی جنگی بیڑے کو اپ گریڈ کرنے کے لیے 4 بلین ڈالر کی ضرورت ہے۔ ہندوستان ایروناٹکس لمیٹڈ (ایچ اے ایل) نے پہلے ہی اپ گریڈ پروگرام کے لیے ایک تجویز پیش کی ہے، جس کی جلد ہی حکومت کی طرف سے منظوری ملنے کی امید ہے۔

نوڈل ایجنسی کے طور پرایچ اے ایل  تقریباً 150 جنگی طیاروں کو ‘سپر سخوئی’ کے طور پر اپ گریڈ کرے گا جو پانچویں نسل کے لڑاکا طیاروں کے ساتھ مطابقت رکھے گا، جس کے بعد ہندوستانی فضائیہ کی جنگی صلاحیت میں کئی گنا اضافہ ہو جائے گا۔

ہندوستان ایروناٹکس لمیٹڈ اور ہندوستانی فضائیہ مشترکہ طور پر سخوئی 30 ایم کے آئی کے آلات اور نظام کو حتمی شکل دیں گے جس کے بعد 150 طیاروں کو اپ گریڈ کیا جائے گا۔ ‘سپر سخوئی’ پروگرام کو روس نے منظوری دے دی ہے، کیونکہ سخوئی-30ا یم کے آئی  ہندوستان اور روس کی مشترکہ پیداوار ہے۔

سخوئی کو اپ گریڈ کرنے کے لیے کئی پارٹس  اور پرزے روس سے آنے  ہیں۔سپر سکھوئی میں ایک جدید کاک پٹ شامل ہوگا۔ اپ گریڈ کے ایک بڑے حصے میں 150 لڑاکا طیاروں کو تکنیکی طور پر پانچویں نسل کے لڑاکا طیاروں کے ساتھ ہم آہنگ بنانے کے لیے ایویونکس اور سینسرز بھی شامل ہیں۔

ایچ اے ایل مجوزہ ’سپرسخوئی‘ پروگرام میں جدید ترین ایم کے 3 اے ای ایس اے  فائر کنٹرول ریڈار تیار کرے گا۔ فضائیہ کے سخوئی ۔30ایم کے آئی کو مستقبل کی فضائی لڑائی میںبامعنی بنائے رکھنے کے لئے  اپ گریڈ کرنا اس لئے ضروری ہو گیا ہے کیونکہ اس کا سافٹ ویئر بہت تیزی سے خراب ہو رہا ہے۔ فضائیہ کو توقع ہے کہ پہلا سپر سخوئی طیارہ 2025 تک تیار ہو جائے گا۔