ہماچل پردیش کابینہ میں توسیع، سات ایم ایل اے نے وزیر کے طور پر حلف لیا

شملہ ضلع کا رہا دبدبہ، دھنی رام شانڈل سب سے بزرگ اور وکرمادتیہ سنگھ سب سے کم عمر وزیر

شملہ،8 جنوری (انڈیا نیرٹیو)

ہماچل پردیش میں سکھوندر سنگھ سکھو کی قیادت والی کانگریس حکومت کی کابینہ میں اتوار کو توسیع کی گئی۔ سات ایم ایل اے کو عہدے کا حلف دلایا گیا۔

گورنر راجندر وشوناتھ آرلےکر نے راج بھون میں ایک پروقار تقریب میں نئے وزرا  کو عہدے اور رازداری کا حلف دلایا۔ کابینہ کی توسیع میں شملہ ضلع کا دبدبہ رہا۔ سب سے زیادہ تین وزیر شملہ ضلع سے بنائے گئے ہیں۔ سب سے زیادہ 15 سیٹوں والے کانگڑا ضلع کو ایک وزیر ملا ہے۔ سب سے پہلے سولن کے ایم ایل اے دھنی رام شانڈل کو حلف دلایا گیا۔

ان کے بعد جوالی کے ایم ایل اے چندر کمار، پھر شلائی کے ایم ایل اے ہرش وردھن چوہان، کنور کے ایم ایل اے جگت سنگھ نیگی، جبل کوٹکھائی ایم ایل اے روہت ٹھاکر، کسمپٹی ایم ایل اے انیرودھ سنگھ اور آخر میں شملہ دیہی ایم ایل اے وکرمادتیہ سنگھ کو عہدے اور رازداری کا حلف دلایا گیا۔ وکرمادتیہ سنگھ سابق وزیر اعلیٰ ویربھدر سنگھ اور ریاستی کانگریس صدر پرتیبھا سنگھ کے بیٹے ہیں۔ ہرش وردھن اور جگت سنگھ نے انگریزی میں اور باقی ہندی میں حلف لیا۔

کابینہ کی توسیع میں سینئرٹی اور تجربہ رکھنے والے نوجوان چہروں کو ترجیح دی گئی ہے۔ علاقائی اور ذات پات کے توازن کا بھی خیال رکھا گیا ہے۔ سکھو کابینہ میں 82 سالہ دھنی رام شانڈیل سب سے بزرگ اور 33 سالہ وکرمادتیہ سنگھ سب سے کم عمر ہیں۔ دھنی رام شانڈیل اور چندر کمار کو چھوڑ کر دیگر پانچ ایم ایل اے پہلی بار وزیر بنے ہیں۔