اڈانی معاملے پر جے پی سی کے مطالبے پر اپوزیشن اٹل: کھڑگے

نئی دہلی، 07 فروری (انڈیا نیریٹو)

کانگریس صدر اور راجیہ سبھا میں اپوزیشن لیڈر ملکارجن کھڑگے نے منگل کو کہا کہ اپوزیشن اڈانی گروپ کے خلاف الزامات پر مشترکہ پارلیمانی کمیٹی (جے پی سی) کے مطالبے پر قائم ہے۔

میڈیا سے بات کرتے ہوئے کھڑگے نے کہا کہ اپوزیشن پارٹیاں چاہتی ہیں کہ پارلیمنٹ چلے، لیکن حکمراں پارٹی اڈانی معاملے پر کوئی جواب نہیں دینا چاہتی۔ اسی لیے ایوان کی کارروائی بار بار ملتوی کی جا رہی ہے۔ اس تناظر میں کھڑگے نے مزید کہا کہ انہوں نے قاعدہ 267 کے تحت ایوان میں اڈانی معاملے پر بحث کے لیے نوٹس دیا تھا، لیکن اسے مسترد کر دیا گیا۔

قابل ذکر ہے کہ اپوزیشن کا مطالبہ ہے کہ ہنڈن برگ کی طرف سے اڈانی گروپ پر لگائے گئے الزامات کی جانچ کے لیے جے پی سی قائم کی جائے۔ اپوزیشن کا الزام ہے کہ لائف انشورنس کارپوریشن آف انڈیا نے مودی حکومت کے کہنے پر اڈانی گروپ میں سرمایہ کاری کی تھی۔ ایسے میں تمام پہلوؤں پر تحقیقات ہونی چاہئیں۔