لدھیانہ میں سیور گیس لیک، کتنے لوگوں کی ہوئی موت؟ کیا ہے پورا معاملہ؟

لدھیانہ،30اپریل( انڈیا نیرٹیو)

پنجاب کے لدھیانہ میں اتوار کی صبح سیور گیس لیک ہونے سے10لوگوں کی موت ہوگئی ہے، جب کہ 12سے زیادہ لوگوں کی طبیعت بگڑگئی ہے۔ مرنے والوں میں بچے بھی شامل ہیں۔ پولس نے پورے علاقہ کو خالی کرالیا ہے اور فائربریگیڈ اوراین ڈی آر ایف کی ٹیم راحت بچاؤمیں لگی ہوئی ہے۔

علاقے میں تحقیقاتی مہم چلائی جا رہی ہے۔ پولیس کے مطابق گیاس پورہ کے علاقے میں فائر بریگیڈ کی گاڑیاں موقع پر پہنچ گئی ہیں۔ ایمبولینس کا بھی انتظام کیا گیا ہے۔

عینی شاہدین کے مطابق اچانک گیس لیک ہونے سے بھگدڑ جیسی صورتحال بن گئی۔ انہوں نے دعویٰ کیا کہ گیس پاس کی ہی ایک فیکٹری سے لیک ہوئی ہے۔ جیسے ہی اس بارے میں لوگوں کو جانکاری ملی، سب ادھر ادھر بھاگنے لگے۔ زیادہ تر لوگ بھاگ کر فیکٹری سے دور پہنچ گئے ہیں۔

جائے حادثہ کے نزدیک رہنے والے ڈاکٹر شمبھو نارائن سنگھ نے بتایا کہ ان کے گھر کے پانچ آدمی گیس لیک ہونے کے بعد بے ہوش ہوگئے ہیں۔ مجھے گھر کے نزدیک نہیں جانے دیا جارہا ہے۔

آس پاس کے سبھی لوگوں پر اس کا اثر پڑا ہے۔ موقع پر موجود انجل کمار نے بتایا کہ میرے چاچا کی یہاں آرتی کلینک نام سے شاپ ہے۔ ان کا پورا خاندان بے ہوش ہوگیا ہے۔ 2 لوگوں کی لاش اب بھی گھر میں پڑی ہوئی ہے۔ انجل نے بتایا کہ ان کے اہل خانہ کی لاشیں پوری طرح سے نیلی پڑچکی ہیں۔