مہاراشٹر میں جلد ہی یکساں سول کوڈ نافذ کیا جائے گا: دیویندر فڑنویس

ممبئی، یکم دسمبر (انڈیا نیریٹو)

نائب وزیر اعلیٰ دیویندر فڑنویس نے کہا کہ مہاراشٹر میں جلد ہی یکساں سول کوڈ نافذ کیا جائے گا۔ لیکن اس کا اعلان صرف وزیر اعلیٰ کریں گے۔

دیویندر فڑنویس نے جمعرات کو نامہ نگاروں کو بتایا کہ ملک کی تمام ریاستوں میں یکساں سول کوڈ لاگو کیا جا رہا ہے۔ مرکزی وزیر داخلہ نے تمام ریاستوں سے کہا ہے کہ وہ اپنے طور پر یکساں سول کوڈ قانون کو نافذ کریں۔ اس لیے تمام ریاستوں کو اس سلسلے میں کبھی نہ کبھی کوئی فیصلہ لینا ہی پڑے گا۔ تمام ریاستیں اپنی سہولت کے مطابق اسے نافذ کر رہی ہیں۔ اسے مہاراشٹر میں بھی لاگو کرنے پر غور کیا جا رہا ہے۔

دیویندر فڑنویس نے کہا کہ گوا میں یکساں سول کوڈ لاگو کیا گیا ہے اور اسے اتراکھنڈ، ہماچل پردیش اور گجرات میں لاگو کیا جائے گا۔ مہاراشٹر میں بھی اسے نافذ کرنے کی تیاریاں کی جا رہی ہیں، لیکن اس کا اعلان کرنے کا حق وزیر اعلیٰ کے پاس ہے۔