اترپردیش اسمبلی انتخابات: تیسرے مرحلے کی تیاریاں زوروں پر، 16 اضلاع کی 59 سیٹوں پر 20 کو ووٹنگ

<p dir="RTL" style="text-align: justify;">
اتر پردیش میں پہلے اور دوسرے مرحلے کی ووٹنگ کے بعد اب تیسرے مرحلے کے لیے تیاریاں ہو رہی ہیں۔ سیاسی جماعتوں نے  جلسوں اور روڈ شوز کے ذریعے انتخابی ماحول میں گرمی پیدا کر دی ہے۔</p>
<p dir="RTL" style="text-align: justify;">
تیسرے مرحلے کی پولنگ 20 فروری کو ریاست کے 16 اضلاع کی 59 سیٹوں پر ہوگی۔ تیسرے مرحلے میں 59 اسمبلی سیٹوں میں سے 15 سیٹیں درج فہرست ذاتوں کے لیے مخصوص ہیں۔ اس مرحلے میں ایس پی سربراہ اکھلیش یادو سمیت 627 امیدوار میدان میں ہیں۔ ووٹروں کی کل تعداد 2.16 کروڑ ہے۔</p>
<p dir="RTL" style="text-align: justify;">
جن علاقوں میں تیسرے مرحلے کی پولنگ ہوگی۔ انہیں یادو لینڈ اور بندیل کھنڈ کے نام سے جانا جاتا ہے۔ یہ علاقہ سماج وادی پارٹی کا گڑھ سمجھا جاتا ہے، لیکن 2017 کے انتخابات میں یہاں کی تقریباً 90 فیصد سیٹوں پر بھارتیہ جنتا پارٹی نے قبضہ کر لیا تھا۔ بی جے پی نے کل 59 میں سے 49 سیٹیں جیتیں۔ اس وقت ایس پی صرف نو سیٹوں پر سمٹ گئی تھی۔ کانگریس کو ایک سیٹ ملی، بی ایس پی اپنا کھاتہ بھی نہیں کھول سکی۔</p>
<p dir="RTL" style="text-align: justify;">
ایسے میں تیسرے مرحلے کا الیکشن بی جے پی اور ایس پی دونوں کے لیے بڑا چیلنج ہے۔ جہاں ایس پی اپنے گڑھ کو بچانے کی فکر میں ہے، وہیں بی جے پی اپنی سیٹیں برقرار رکھنے کی پوری کوشش کر رہی ہے۔ بی جے پی کے سینئر لیڈر اور مرکزی وزیر داخلہ امت شاہ اور اتر پردیش کے وزیراعلی یوگی آدتیہ ناتھ نے منگل کو تیسرے مرحلے کے علاقوں میں زبردست  مہم چلائی۔ امت شاہ نے کانپور میں روڈ شو بھی کیا۔</p>
<p dir="RTL" style="text-align: justify;">
<strong>ان 16 اضلاع میں تیسرے مرحلے کی پولنگ ہے</strong></p>
<p dir="RTL" style="text-align: justify;">
تیسرے مرحلے میں ہاتھرس، فیروزآباد، ایٹہ، کاس گنج، مین پوری، فرخ آباد، قنوج، اٹاوہ، اوریا، کانپور دیہات، کانپور نگر، جالون، جھانسی، للت پور، حمیر پور اور مہوبہ کی 59 ودھان سبھا سیٹوں کے لیے 20فروری کو پولنگ ہوگی۔  </p>