گوہاٹی میں پہلی عالمی روایتی ادویات کانفرنس جاری

مرکزی وزیر سربانند سونووال نے گذشتہ روز کہا کہ شنگھائی تعاون تنظیم  کے تحت گوہاٹی میں منعقد  ہورہی پہلی روایتی ادویات کانفرنس میں 17 ممالک کے 150 سے زیادہ مندوبین کے شرکت کررہے ہیں۔

شنگھائی میں 2001 میں قائم ہونے والی ایک بین الحکومتی تنظیم  شنگھائی تعاون کونسل اس وقت آٹھ رکن ممالک پر مشتمل ہے – چین، بھارت، قازقستان، کرغزستان، روس، پاکستان، تاجکستان اور ازبکستان۔

 اس میں چار مبصر ریاستیں اور چھ “ڈائیلاگ پارٹنرز” بھی ہیں۔سونووال نے یہاں ایک پریس کانفرنس میں کہا کہ  ایس  سی او کے تحت بی2بی عالمی کانفرنس اور روایتی ادویات پر ایکسپو 2 مارچ کو شروع ہو کر 5 مارچ کو اختتام پذیر ہو گی۔

اس تقریب میں 17 ممالک کے 150 سے زائد مندوبین شرکت کر رہے ہیں۔ شنگھائی تعاون تنظیم اور شراکت دار ممالک کے وزرائے صحت، حکام اور غیر ملکی خریدار شرکت کریں گے۔ مجموعی طور پر 75 غیر ملکی حکام اور کاروباری مندوبین نے فزیکل موڈ میں اپنی شرکت کی تصدیق کی ہے۔

مرکزی آیوش وزیر نے کہا کہ جسمانی طور پر موجود ہونے کے علاوہ چین، ازبکستان، کرغزستان اور قازقستان کے سرکاری مندوبین آن لائن سمٹ میں شامل ہوں گے۔ انہوں نے کہا کہ ہمیں یہ بتاتے ہوئے بے حد خوشی ہوتی ہے کہ ہندوستان اس سال  ایس  سی او – ایک باوقار بین حکومتی تنظیم – کی صدارت کر رہا ہے۔

اس مینڈیٹ کے تحت، ہم گوہاٹی میں ایس سی او کی پہلی بین الاقوامی کانفرنس اور روایتی ادویات پر ایکسپو کا انعقاد کر رہے ہیں۔بی2بی کانفرنس میں روایتی ادویات کی مصنوعات اور طریقوں کے لیے ایک ریگولیٹری فریم ورک پر  ایس سی او اور شراکت دار ممالک سے تفصیلی پریزنٹیشنز اور غور و خوض ہوگا۔