ورلڈ یوتھ ویٹ لفٹنگ چیمپئن شپ میں ہندوستان کی 13رکنی ٹیم حصہ لے گی

ورلڈ یوتھ ویٹ لفٹنگ چیمپئن شپ میں اس بار ہندوستان کی  13 رکنی ٹیم شامل ہوگی۔ انڈین  ویٹ لفٹنگ فیڈریشن (آئی ڈبلیوایف ایف) نے 25 مارچ سے 1 اپریل تک ڈیورس (البانیہ) میں منعقد ہونے والی ورلڈ یوتھ ویٹ لفٹنگ چیمپئن شپ کے لیے 13 رکنی ٹیم(چھ مرد اور سات خواتین) کا انتخاب کیا ہے۔ پچھلی بار چیمپئن شپ میں تمغے جیتنے والے چھ لفٹرز میں سے دو موجودہ ٹیم میں شامل ہیں۔ پچھلی بار اس چیمپئن شپ میں پانچ مرد اور سات خواتین لفٹرز نے حصہ لیا تھا۔

ویٹ لفٹر سیناپتی گرونائیڈو ایک بار پھر ورلڈ یوتھ چیمپئن میں میڈل کے لئے اپنا دعویٰ پیش کرنے جا رہے ہیں۔ گرو نائیڈو سے لوگوں کو تمغے کی امید  ہے۔

 گرونائیڈو نے گزشتہ سال جون کے مہینے میں لیون (میکسیکو) میں منعقدہ چمپئن شپ میں 55 ویٹ زمرہ میں طلائی تمغہ جیتا تھا۔ اس بار بھی وہ اسی وزن میں اپنا چیلنج پیش کرنے جا رہے ہیں۔

 پچھلی بار اس چمپئن شپ میں ہندوستان نے ایک طلائی تمغہ، دوچاندی  اور تین کانسے کا تمغہ جیت کر اپنی بہترین کارکردگی کا مظاہرہ کیا تھا۔

گذشتہ چمپئن شپ میں مہاراشٹر کی اکانکشا نے 40 وزن کے زمرے میں 127 کلوگرام وزن اٹھا کر چاندی کا تمغہ جیتا تھا، جب کہ گرونائیڈو نے 230 کلوگرام وزن اٹھایا تھا۔ اس بار اکانکشا ویوہارے  45 ویٹ کیٹیگری میں کھیلنے جا رہی ہیں۔

 ڈیرس میں کھیلنے جا رہے مرد ویٹ لفٹرز میں ایل دھنوش، طفیل (49)، سیناپتی گرونائیڈو، تومچھوو میتئی (55)، گولم ٹنکو (61)، بیدابرت بھرالی (67) ہیں۔ خواتین ویٹ لفٹرز میں جیوتسنا سابر (40)، اشمیتا دھونے، اکانکشا ویو ہارے (45)، کوئل بار (49)، مینا سانتا (55)، سنجنا (76)، ایم مارٹینا دیوی (پلس 81 کلوگرام) شامل ہیں۔ منی پور کی مارٹینا دیوی نے کھیلو انڈیا گیمز میں ریکارڈ کے ساتھ طلائی تمغہ جیتا تھا۔