ایودھیا میں وزیر اعظم نے کیا بھومی پوجن

ملک کے وزیر اعظم شری نریندر مودی نے ۵ اگست کو ایودھیا میں شری رام مندر کی تعمیر کے لئے بھومی پوجن کیا۔کورونا کی وجہ سے سخت حفاظتی انتظامات کئے گئے تھے۔ ایودھیاکے ڈی ایم انوج جھا نے کہا کہ بھومی پوجن پروگرام میں صرف وہی لوگ جا سکیں گے جو ٹیسٹ میں کورونا انفکشن سے فری پائے جائیں گے۔ ڈی ایم مسٹر انوج جھا نے بتایا کہ یہاں آنے والے تمام لوگوں کا ٹیسٹ کرایا گیا ہے۔
5اگست 2020کے تاریخی دن ملک کے وزیر اعظم نے ایودھیا میں بھومی پوجن کے بعد مندر کی بنیاد رکھی۔ واضح رہے کہ سپریم کورٹ کے فیصلے کے بعد اب ایودھیا میں شری رام کا مندر بن رہا ہے۔ ملک کے زیادہ تر اہم ترین شخصیات کا کہنا ہے کہ ایودھیا میں ایک شاندار رام مندر کی تعمیر سے ملک کے اندر ایک نئی فضا قائم ہوگی۔ مراد آباد کی ممتاز شخصیت مظاہر خان کا کہنا ہے کہ رام مندر کی تعمیر سے ملک کے ہندو مسلمان سبھی خوش ہیں۔
ڈی ایم انوج جھا نے صحافیوں سے بات کرتے ہوئے بتایا کہ کورونا کی وجہ سے بہت کم لوگوں کو اس پروگرام میں شرکت کا دعوت نامہ بھیجا گیا تھا۔ یہاں تک کہ پولس اور دیگر سرکاری ملازمین کی ڈیوٹی لگاتے وقت اس بات کو یقینی بنایا گیا ہے کہ وہ کرونا ٹیسٹ میں نیگیٹیو پائے گئے ہوں۔ کورونا ٹیسٹ کے بعد ہی سرکاری ملازمین کی ڈیوٹی ایودھیا میں لگائی گئی ہے۔ ایودھیا اور آس پاس کے علاقے میں کورونا گائیڈ لائنس کا سختی سے نفاذ عمل میں لایا گیا ہے۔ ہنومان گڑھی مندر کے سبھی پجاریوں کا بھی کورونا ٹیسٹ کرایا گیا تھا کیونکہ بھومی پوجن سے پہلے وزیر اعظم کا ہنومان مندر میں پوجا کرنے کا پروگرام طے تھا۔ کمشنر ڈاکٹر نیرج شکلا نے بتایا کہ رام جنم بھومی علاقے کے علاوہ بھی سبھی اہم مقامات پر سینی ٹائزیشن کا کام لگاتار چلتا رہا۔ اس علاقے میں داخل ہونے والے ہر شخص کو فیس ماسک لگانا ضروری قرار دیا گیا۔ سوشل ڈسٹنسنگ کا پورا پورا خیال رکھ کر ہی مہمانوں کے بیٹھنے کا انتظام کیا گیا ہے۔
سی ایم او ڈاکٹر گھنشیام سنگھ کے مطابق پروگرام میں شامل تمام لوگوں کی کورونا جانچ کرا لی گئی ہے۔ پجاری آچاریہ ستندر داس نے اپنی خوشی کا اظہار کرتے ہوئے بتایا کہ انھیں برسوں سے اس دن کا انتظار تھا۔ وزیر اعظم کے آنے سے پروگرام کے وقار میں اضافہ ہوا ہے۔ پوجا کے طور طریقوں کے بارے میں پجاری ستندر داس اور انتظامیہ کے افسران کے درمیان پہلے ہی بات ہو چکی تھی۔ پوجا کی تھالی، آرتی، پرساد، پھول، اچھت، وغیرہ رکھ کر سامنے رکھ دیا جائے گا، یہ بات پہلے سے طے تھی۔ کیونکہ ملک بھر میں پھیلے کورونا کی بیماری نے ایودھیا کے اس پروگرام پر بھی اثر ڈالا۔ لیکن انتظامیہ کی سوجھ بوجھ سے پروگرام بڑی خوبصورتی سے اختتام کو پہنچا اور کورونا کی گائیڈ لائنس کا پورا پورا خیال بھی رکھا گیا۔
.