برفانی طوفان نےامریکہ کےبعدکینیڈا،میکسیکو،جاپان اورآسٹریا تک مچائی تباہی

امریکہ میں ہلاکتوں کی تعداد 60 تک پہنچ گئی،کینیڈا میں چار افراد ہلاک ہوئے

جاپان میں 17،میکسیکو کے کئی شہر اندھیرے میں ڈوب گئے

آسٹریا میں لوگ برف کی چادر میں دب گئے، فضائی خدمات معطل

واشنگٹن،27 دسمبر (انڈیا نیرٹیو)

امریکہ سے ٹکرانے والا جان لیوا برفانی طوفان اب دنیا کے دیگر ممالک میں بھی تباہی مچا رہا ہے۔ امریکہ کے بعد کینیڈا، میکسیکو، جاپان اور آسٹریا تک برفانی طوفان جان لیوا اور مصیبت ثابت ہو رہا ہے۔

 امریکہ میں اب تک 60 اور جاپان میں برفباری کے باعث 17 افراد ہلاک ہو چکے ہیں۔ میکسیکو کے کئی شہر بجلی سے محروم تھے اور آسٹریا میں کئی لوگ برف کی موٹی چادر کے نیچے دب گئے۔

امریکہ میں برفانی طوفان سے ملک کے تقریباً 20 کروڑ لوگ بری طرح متاثر ہوئے ہیں۔ نیویارک اور مونٹانا جیسے شہروں کا درجہ حرارت منفی 45 ڈگری سینٹی گریڈ تک پہنچ گیا ہے۔ امریکی حکام اسے صدی کا بدترین طوفان قرار دے رہے ہیں۔

 امریکہ میں لاکھوں گھر بجلی سے محروم ہو چکے ہیں، ٹریفک ٹھپ ہو کر رہ گئی ہے اور چاروں طرف برف جمع ہو گئی ہے۔ آئیووا، وسکونسن، مینیسوٹا اور مشی گن میں بھی حالات خراب ہیں۔ بفیلو سٹی میں حد نگاہ صفر ہوگئی اور ایری جھیل منجمد ہوگئی۔

 نیویارک کی گورنر کیتھی ہوچل نے صدر جو بائیڈن سے فون پر بات کی، ان سے مدد کی درخواست کی۔ مغربی نیویارک کے علاقے 30 سے 40 انچ تک برف سے ڈھکے رہے۔

 طوفان کے باعث سیٹل میں بجلی بند ہو گئی۔ اٹلانٹا، شکاگو، ڈینور، ڈیٹرائٹ اور نیویارک کے ہوائی اڈے بری حالت میں ہیں اور ہوائی ٹریفک ٹھپ ہو کر رہ گئی ہے۔ خراب موسم کے باعث 15 ہزار سے زائد پروازیں منسوخ کر دی گئی ہیں۔