پیرس میں گونجا علامہ اقبال کا تحریر کردہ ترانہ’سارے جہاں سے اچھا ہندوستان ہمارا‘،کیا ہے پورا معاملہ؟

مودی 14 جولائی کو باسٹل ڈے پریڈ کے مہمان خصوصی ہوں گے

بھارت کی زمینی، آبی اور فضائیہ کی ٹیمیں بھی مارچ کریں گی، رافیل نے ریہرسل میں اڑان بھری

پیرس، 12 جولائی (انڈیا نیرٹیو)

 فرانس کے دارالحکومت پیرس میں 14 جولائی کو ہونے والی باسٹل ڈے پریڈ کی ریہرسل کے دوران علامہ اقبال کا تحریر کردہ معروف زمانہ ترانہ ہندی ‘سارے جہاں سے اچھا ہندوستان ہمارا’ بھی گونج اٹھا۔ اس پریڈ میں ہندوستان کی فوج، بحریہ اور فضائیہ کی ٹیمیں بھی مارچ کریں گی اور بدھ کو منعقدہ ریہرسل میں ہندوستان کی تینوں فوجوں کے سینئر افسران نے حصہ لیا۔ پریڈ کے دوران ہندوستان کے وزیر اعظم نریندر مودی بھی مہمان خصوصی کے طور پر شریک ہوں گے۔

فرانسیسی فوج بھی بھارتی وزیراعظم کی مہمان نوازی پر پرجوش ہے۔ فرانسیسی فضائیہ کے کرنل تھیری نے کہا کہ جب فرانسیسی فوجی باسٹل ڈے پریڈ پر مارچ کر رہے ہوں گے تو وہ ہندوستان کے وزیر اعظم اور فرانسیسی صدر کی طرف دیکھیں گے۔ یہ بہت جذباتی لمحہ ہوگا کیونکہ فوجی اس سے تقریباً 30 میٹر دور ہوں گے۔ اس پریڈ میں ہندوستان کی جانب سے آرمی، نیوی اور ایئر فورس کی ٹیمیں بھی حصہ لیں گی۔

بدھ کو ریہرسل کے دوران ہندوستانی دستے نے ‘سارے جہاں سے اچھا ہندوستان ہمارا’ کی دھن پر مارچ کیا۔ ہندوستانی بحریہ کے کمانڈر پرتیک کمار نے کہا کہ یہ نہ صرف مسلح افواج بلکہ ہندوستان کے تمام لوگوں کے لئے ایک عظیم احساس ہے کہ ہمیں باسٹیل ڈے کے باوقار تقریب میں فرانسیسی حکومت کی نمائندگی کرنے کا موقع دیا گیا ہے۔ ہمیں آرمی، نیوی اور ایئر فورس کے سہ فریقی دستے کے حصے کے طور پر یہاں آکر خوشی ہے۔ اس دوران فضائیہ کا دستہ بھی آسمان پر اپنی طاقت کا مظاہرہ کرے گا۔ اس مشترکہ فلائی پاسٹ میں رافیل بھی موجود رہے گا۔ ریہرسل کے دوران بھی رافیل کو پیرس کے آسمان پرپرواز کرتے ہوئے دیکھا گیا۔