بھارتی نژاد ارونا ملر امریکی ریاست میری لینڈ کی لیفٹیننٹ گورنر بنی

بھارتی نژاد ارونا ملر امریکی ریاست میری لینڈ کی لیفٹیننٹ گورنر بن گئیں۔ وہ اس عہدے تک پہنچنے والی پہلی غیر ملکی خاتون ہیں۔ ملر ہاؤس آف ڈیلیگیٹس کی رکن رہی ہیں۔

امریکہ میں ہندوستانی نڑاد لوگوں کی سیاسی گرفت مضبوط ہوتی جا رہی ہے۔ ہندوستانی نڑاد ارونا ملر نے حال ہی میں منعقدہ امریکی ریاست میری لینڈ کے انتخابات میں لیفٹیننٹ گورنر کا عہدہ جیت لیا ہے۔ وہ گورنر ہاؤس پہنچنے والی پہلی غیر ملکی خاتون بن گئی ہیں۔ میری لینڈ کے انتخابی نتائج کے بعد، ارونا ملر نے ٹویٹ کیا کہ ان کی پوری کمیونٹی اور عوام نے انہیں اپنی مہم میں بہترین بننے کی ترغیب دی۔ انہوں نے کہا کہ وہ اپنے حامیوں کے عزم اور حمایت کے لیے اظہار تشکر الفاظ میں نہیں کرسکتی۔

ارونا، جو اصل میں حیدرآباد، ہندوستان کی رہائشی ہیں، سات سال کی عمر میں 1972 میں ہندوستان سے امریکہ پہنچی تھیں۔ ارونا نے 1989 میں مسوری یونیورسٹی آف سائنس اینڈ ٹیکنالوجی سے سول انجینئرنگ میں گریجویشن کیا۔ انہوں نے مونٹگمری کاؤنٹی ڈپارٹمنٹ آف ٹرانسپورٹیشن میں 25 سال کام کیا ہے۔ وہ 2010 سے 2018 تک میری لینڈ ہاؤس آف ڈیلیگیٹس کی رکن تھیں۔ ارونا کے شوہر ڈیو ملر ہیں۔ارونا تین بیٹیوں کی ماں ہیں۔