بائیڈن کا بڑا حملہ: پاکستان خطرناک ملک، بغیر ہم آہنگی کے جمع کئے جوہری ہتھیار

امریکی صدر نے اٹلی اور ہنگری کو بھی نشانہ بنایا

امریکی صدر جو بائیڈن نے پاکستان پر شدید حملہ کیا ہے۔ انہوں نے پاکستان کو ایک انتہائی خطرناک ملک قرار دیتے ہوئے الزام لگایا کہ وہ بغیر ہم آہنگی کے جوہری ہتھیاروں کوجمع کر رہا ہے۔ امریکی صدر نے اٹلی اور ہنگری کو بھی نشانہ بنایا ہے۔

امریکی وسط مدتی انتخابات کے لیے فنڈ ریزنگ سے متعلق ایک تقریب کے دوران بائیڈن نے کہا کہ پاکستان دنیا کے خطرناک ترین ممالک میں سے ایک ہے۔ انہوں نے کہا کہ پاکستان نے بغیر کسی مفاہمت کے ایٹمی ہتھیاروں کا ذخیرہ کر رکھا ہے۔ یہ صورتحال پوری دنیا کے لیے خطرناک ہے۔

بائیڈن نے ہنگری اور اٹلی کو بھی نشانہ بنایا۔ انہوں نے کہا کہ جمہوریت کے معاملے پر دنیا بھر میں جاری بحث کو دیکھیں تو آپ کو حقیقت نظر آئے گی۔ نیٹو کا رکن ہونے کے باوجود ہنگری جمہوریت کے لیے سنجیدہ نہیں ہے۔

قابل ذکر ہے کہ ہنگری کے وزیر اعظم وکٹر اوربان کو روسی صدر ولادیمیر پوتن کے بہت قریب سمجھا جاتا ہے۔ اسی طرح انہوں نے اٹلی کے کردار پر بھی سوالات اٹھائے۔ انہوں نے پاکستان، ہنگری اور اٹلی جیسے ممالک سے محتاط رہنے کی بھی بات کی۔

پاکستان کے بارے میں بائیڈن کے بیان سے پاکستان کی امیدوں کو دھچکا لگا ہے۔ حال ہی میں پاک فوج کے سربراہ جنرل قمر جاوید باجوہ نے امریکہ کا دورہ کیا ہے۔ انہوں نے امریکی وزیر دفاع کے ساتھ کئی دوسرے رہنماؤں سے بھی ملاقات کی۔