زلزلے سے ملک میں کئی مقامات پر کانپی زمین، نیپال میں 6 کی موت

دہلی-این سی آر سمیت شمالی ہندوستان میں رات بھر خوف و ہراس، ریکٹر اسکیل پر شدت 6.3

نئی دہلی/کٹھمنڈو، 9 نومبر (انڈیا نیریٹو)

قومی راجدھانی دہلی-این سی آر، شمالی ہندوستان کے علاوہ نیپال میں منگل کی نصف شب کے بعد آئے زلزلے کے شدید جھٹکوں سے زمین لرز اٹھی۔ لوگ انجانے خوف سے کانپ اٹھے۔ بہت سے لوگ نیند سے بیدار ہوکر گھر کے باہر نکل آئے۔

دہلی-این سی آر میں ریکٹر اسکیل پر زلزلے کی شدت 6.3 ریکارڈ کی گئی ہے۔  دہلی کے لوگوں کی نیند 1 بج کر 58 منٹ پر بستر کے تیزی سے ہلنے سے اچانک ٹوٹ گئی۔ لوگ کچھ سمجھ نہ سکے اور خوف کے مارے گھروں سے باہر نکل آئے۔ زلزلے کے جھٹکے نوئیڈا، غازی آباد اور قریبی شہروں میں بھی محسوس کیے گئے۔

گزشتہ 24 گھنٹوں میں تین مرتبہ زلزلے کے جھٹکے آئے۔

نیپال کے نیشنل سیسمولوجیکل سینٹر کے مطابق ملک کا صدور مغربی خطہ میں گزشتہ 24 گھنٹوں میں تین مرتبہ زلزلے کے جھٹکے آئے۔ دوتی ضلع میں زلزلے کے بعد مکان منہدم ہونے سے مرنے والوں کی تعداد چھ ہو گئی ہے۔ نیپال پولیس کا کہنا ہے کہ ہلاک ہونے والوں میں ایک خاتون اور دو بچے بھی شامل ہیں۔ لیکن ابھی تک کسی کی شناخت نہیں ہو سکی ہے۔ پانچ افراد زخمی ہوئے ہیں۔ دوتی ضلع میں اس دوران لینڈ سلائیڈنگ سے درجنوں مکانات کو نقصان پہنچا ہے۔

پتھورا گڑھ: نیشنل سینٹر فار سیسمولوجی کے مطابق، اتراکھنڈ کے پتھورا گڑھ میں آج صبح تقریباً 6:27 بجے 4.3 شدت کا زلزلہ آیا ہے۔ زلزلے کی گہرائی زمین سے 5 کلومیٹر نیچے تھی۔

منی پور: نیشنل سینٹر فار سیسمولوجی کے مطابق نیپال اور منی پور میں تقریباً 1:57 بجے 6.3 شدت کا زلزلہ آیا۔ زلزلے کی گہرائی زمین سے 10 کلومیٹر نیچے تھی۔

لکھنؤ: نیشنل سینٹر فار سیسمولوجی کے مطابق، منگل کی رات 8.52 بجے اتر پردیش کی راجدھانی لکھنؤ سمیت ریاست کے کئی اضلاع میں زلزلے کے جھٹکے محسوس کیے گئے۔ ریکٹر اسکیل پر زلزلے کی شدت 4.9 ریکارڈ کی گئی۔ زلزلے کا مرکز ہند-نیپال سرحد پر دھارچولا علاقے میں زمین سے 10 کلومیٹر نیچے بتایا جا رہا ہے۔

ڈوٹی: اتراکھنڈ سے متصل انتہائی مغربی نیپال کے ڈوٹی میں منگل کی رات 9:07 بجے زلزلے کے شدید جھٹکے محسوس کیے گئے۔ نیپال کے نیشنل زلزلہ پیما مرکز کے مطابق ریکٹر اسکیل پر اس کی شدت 5.7 تھی۔ نیپال کے کرنالی اور لمبینی اضلاع میں زلزلے کا سب سے زیادہ اثر رہا۔