امریکہ میں موسم کا قہر، 4400 پروازیں منسوخ،کئی علاقوں میں درجہ حرارت میں گراوٹ

خراب موسم نے پورے امریکہ میں کرسمس کی تقریبات میں خلل ڈال دیا ہے۔ ملک کی تقریباً 70 فیصد آبادی آرکٹک بلاسٹ اور بمب سائیکلون سے گھر گئی ہے۔

فی الحال امریکہ کے کئی علاقوں میں پارہ منفی 20 سے 36 ڈگری سیلسیس تک پہنچ گیا ہے۔ بمب سائیکلون کے باعث 4400 پروازیں منسوخ کر دی گئی ہیں۔ اس طوفان کی وجہ سے امریکہ کے میدانی علاقوں میں لوگوں کو شدید سردی کا سامنا ہے۔ سرد ہواؤں کا طوفان کناڈا سے امریکہ کے نچلے حصے میں لوگوں کے لئے خطرہ بنا ہوا ہے۔

یو ایس نیشنل ویدر سروس کے مطابق امریکہ کے جنوبی علاقوں میں آرکٹک بلاسٹ کی آمد سے صورتحال مزید خراب ہوتی جا رہی ہے۔ جنوبی وسطی امریکی ریاست ٹیکساس میں آرکٹک بلاسٹ کی آمد کے بعد ہزاروں افراد بغیر بجلی کے رہنے کو مجبور ہیں۔ جمعرات کی رات ٹیکساس کے شمالی شہر ڈیلاس کے بڑے حصے تاریکی میں ڈوب گئے۔ ٹیکساس کے دارالحکومت آسٹن اور ہیوسٹن جیسے بڑے شہروں کا بھی شدید سردی کی وجہ سے برا حال ہے۔آرکٹک بلاسٹ کا اثر میکسیکو تک دیکھا جا رہا ہے۔ آرکٹک بلاسٹ کے بعد آنے والے بمب سائیکلون نے امریکہ کی وسط مغربی ریاستوں میں شدید برف باری اور برفانی طوفان کی صورتحال پیدا کردی ہے۔ ایسا اندازہ لگایا جارہا ہے کہ مغربی حصوں کی طرح آئندہ دو روز میں امریکا کے مشرقی علاقوں کے بیشتر علاقے بھی آرکٹک بلاسٹ اور طوفان کی زد میں آجائیں گے۔

امریکی صدر جو بائیڈن مسلسل صورتحال پر نظر رکھے ہوئے ہیں۔ بائیڈن نے کہا ہے کہ یہ واقعی شدید موسم کی وارننگ ہے اور وائٹ ہاؤس سب سے زیادہ متاثرہ ریاستوں کے 26 گورنروں کے ساتھ مسلسل رابطے میں ہے۔