اقوام متحدہ کی انسداد دہشت گردی کمیٹی کااجلاس ہندوستان میں کب اورکہاں؟

دنیا میں دہشت گردی کے نئے چیلنجوں پر غور کرنے کے لئے اقوام متحدہ کی سلامتی کونسل کی انسداد دہشت گردی کمیٹی (سی پی سی) کا خصوصی اجلاس جمعہ (28 اکتوبر) کو ممبئی میں ہوگا۔  سی پی سی کا اجلاس ممبئی کے تاج ہوٹل میں تجویز کیا گیا ہے۔

دو روزہ اجلاس کے پہلے روز اقوام متحدہ کی سلامتی کونسل کے تمام پندرہ رکن ممالک کے سفیرممبئی میں دہشت گردانہ حملوں میں ہلاک ہونے والوں کی یادگار پر خراج عقیدت پیش کریں گے۔ اگلے دن 29 اکتوبر کو راجدھانی دہلی میں کمیٹی کی میٹنگ ہوگی۔اس میں چینی سفارت کار بھی شرکت کریں گے۔

اس اہم ملاقات کے سلسلے میں اقوام متحدہ میں بھارت کی مستقل سفیر روچیرا کمبوج نے وزارت خارجہ میں ایک پریس کانفرنس میں کہا کہ گزشتہ دو دہائیوں کے دوران دہشت گردی اور پرتشدد انتہا پسندی کے چیلنج سے نمٹنے میں خاطر خواہ پیش رفت ہوئی ہے۔

لیکن دہشت گردی کے چیلنج اب بھی موجود ہیں اور ان کارروائیوں میں نئی ٹیکنالوجی کا استعمال کیا جا رہا ہے۔ بھارت میں منعقد کی جا رہی اس میٹنگ میں نئی ابھرتی ہوئی ٹیکنالوجی کے ذریعے دہشت گردانہ کارروائیوں کو انجام دینے کے چیلنجوں پر خصوصی طور پر تبادلہ خیال کیا جائے گا۔

انہوں نے کہا کہ کمیٹی بنیادی طور پر تین چیلنجوں پر غور کرے گی۔ پہلا دہشت گردی کی کارروائیوں میں انٹرنیٹ اور سوشل میڈیا کا استعمال، دوسرا فنڈ اکٹھا کرنے کے لئے ادائیگی کی نئی ٹیکنالوجی کا استعمال اور تیسرا ڈرون جیسے بغیر پائلٹ کے فضائی آلات کا استعمال۔