جناب سربا نند سونووال 9مئی 2023 کو سِتوے بندرگاہ پر پہلے ہندوستانی مال بردار جہاز کا استقبال کریں گے
میانمار میں سِتوے بندر گاہ کا افتتاح، شمال مشرق میں ٹرانسپورٹ کے شعبے میں ایک نئی تبدیلی کا آغاز ہے:جناب سونووال
کولکاتہ اور اگرتلہ اور ایزوال کے درمیان مال کی ڈھلائی کے خرچ اور وقت میں 50 فیصد سے زیادہ کی کمی آئے گی:جناب سونووال
شمال مشرقی ہندوستان کی طویل عرصے سے بین الاقوامی سمندری روٹ تک رسائی کی خواہش تریپورہ اور میزورم کے ذریعے سِتوے بندرگاہ تک کی رسائی سے ممکن ہونے جارہی ہے:جناب سونووال
بندرگاہ ، جہاز رانی اور آبی شاہراہ اور آیوش کے مرکزی وزیر جناب سربانند سونووال 9مئی 2023 کو میانمار کے سِتوے بندرگاہ پر پہلے ہندوستانی مال بردار جہاز کا استقبال کریں گے۔اس تقریب میں سیاما پرساد مکرجی بندرگاہ کولکاتہ سے میانمار کے رکھائین ریاست میں واقع سِتوے بندرگاہ کے درمیان مال بردار جہازو ں کی مستقل آمدو رفت کے افتتاح کا بھی امکان ہے۔یہ دونوں ممالک کے درمیان ٹرانسپورٹ کے شعبے میں ایک نئے عہد کاآغاز ہے۔ جناب سونووال نے آج آسام کے ڈبرو گڑھ میں صحافیوں سے خطاب کرتے ہوئے بتایا کہ اس راہ سے پورے خلیج بنگال کے لئے زبردست اقتصادی صلاحیت کے وا ہونے کا امکان ہے، جس سے جنوبی ایشیا اور جنوب مشرقی ایشیائی خطے کےد رمیان ایک پل کی تعمیر ہوسکے گی۔
