ایم سی ڈی انتخاب میں انڈین یونین مسلم لیگ اتارے گی امیدوار

نوٹوں پر تصویریں چھاپنے سے مہنگائی،بے روز گاری دو ر نہیں ہونگی:نثار احمد نقشبندی

نئی دہلی  31/اکتوبر(انڈیا نیرٹیو)

ایم سی ڈی انتخاب کے پیش نظرانڈین یونین مسلم لیگ کی پارٹی دفتر جوشی کالونی میں میٹنگ کا انعقاد ہوا۔جس میں دہلی پردیش کے صدر مولانا نثار احمد نقشبندی نے کہا کہ دہلی میں عنقریب ایم سی ڈی انتخاب ہونے والے ہیں اور پارٹی لگاتار دہلی میں زمینی سطح پر کام کررہی ہے۔

بلاتفریق پارٹی دہلی والوں کی خدمت میں ہمہ تن مصروف ہے۔گلیوں کی صاف صفائی ہویا پھر کورے کچڑے کا معاملہ ہو،پارٹی کے کارکنان اپنی کوشش سے اسے حل کرنے کی کوشش کرتے رہے ہیں۔دہلی میں زیادہ تر معاملے صاف صفائی اور کوڑے کا رہا ہے جسے پارٹی کے کارکنان نے بحسن خوبی حل کرنے کی کوشش کی ہے۔

پارٹی ایسے کارکنان کو مبارک باد پیش کرتی ہے اور کارکنان پر مزید ذمہ داری عائد کرتی ہے کہ وہ ایم سی ڈی انتخاب کے لیے اپنے میں سے لائق و فائق اور متحرک کارکنان کا نام پیش کریں،جن کی اندر خدمت خلق کا جذبہ ہو،پارٹی ایسے ناموں پر غورو فکر کرکے ایم سی ڈی انتخاب میں امیدوار بنائے گی۔

انہوں نے مزید کہا کہ پارٹی اپنے پورے دم خم کے ساتھ ایم سی ڈی انتخاب میں حصہ لینے جارہی ہے۔جس کے لیے پارٹی دہلی والوں سے اپیل کرتی ہے کہ وہ انڈین یونین مسلم لیگ کی حمایت کریں اور سماج میں ہر سطح پر تبدیلی محسوس کریں۔

اس موقع پر جس میں دہلی پردیش کے صدر مولانا نثار احمد نقشبندی، نیشنل سکریٹری خرم انیس عمر،یوتھ لیگ قومی صدرآصف انصاری، دہلی پردیش کے جنرل سکریٹری شیخ فیصل حسن، اتیب خان ایم ایس ایف کے قومی جنرل سکریٹری،محمد آصف،معین الدین انصاری نائب صدر،نورالشمس،محمد زاہد نائب خزانچی،مولانا دین محمد قاسمی شامل ہوئے۔