مدر ڈیری نے دہلی-این سی آر میں دودھ کی قیمت میں 2 روپے فی لیٹر کا اضافہ کیا

دودھ کے  نئے نرخوں کا اطلاق 27 دسمبر سے

مدر ڈیری نے پیر کے روز دہلی-این سی آر میں دودھ کی قیمت میں 2 روپے فی لیٹر اضافہ کرنے کا اعلان کیا ہے۔ نئی قیمتوں کا اطلاق منگل 27 دسمبر سے ہوگا۔

مدر ڈیری نے فل کریم دودھ کی قیمت میں 2 روپے فی لیٹر اضافہ کر کے 66 روپے فی لیٹر کر دیا ہے جب کہ ٹونڈ دودھ کی قیمت 51 روپے سے بڑھا کر 53 روپے کر دی گئی ہے۔ اسی طرح ڈبل ٹونڈ دودھ کی قیمت 45 روپے سے بڑھا کر 47 روپے فی لیٹر کر دی گئی ہے۔ تاہم، مدر ڈیری نے گائے کے دودھ اور ٹوکن (بلک وینڈیڈ) دودھ کی قیمتوں میں اضافہ نہیں کیا ہے۔

کمپنی کی جانب سے جاری بیان میں کہا گیا ہے کہ کچے دودھ کی قیمت میں 24 فیصد اضافہ ہوا ہے جس کی وجہ سے یہ قدم اٹھایا گیا ہے۔ اہم بات یہ ہے کہ مدر ڈیری نے اس سال اب تک 5ویں مرتبہ دودھ کی قیمتوں میں اضافہ کیا ہے۔ مدر ڈیری دہلی اور آس پاس کے علاقوں میں روزانہ 30 لاکھ لیٹر سے زیادہ دودھ فروخت کرتی ہے۔