عرفان کے بیٹے بابل کی پہلی فلم’کالا’کا پہلا لک اور ٹیزرنیٹ فلکس پرجاری

بالی ووڈ کے عظیم اداکاروں میں شمار کیے جانے والے عرفان خان کے بیٹے بابل خان اپنی پہلی فلم ‘کالا’ کو لے کر کافی عرصے سے بحث میں ہیں۔ اس سلسلہ میں فلم کا ٹیزر اور فرسٹ لک اوٹی ٹی پلیٹ فارم نیٹ فلکس پر جاری کیا گیا ہے۔

ممبئی میں منعقدہ ایک خصوصی تقریب میں بابل خان کی فلم ’کالا‘ کے گانے ’پھیرو نہ نظریہ‘ کی ایک خاص جھلک دکھائی گئی۔ بابل خان کے علاوہ فلم کی مرکزی اداکارہ ترپتی ڈمری کے ریٹرو اوتار نے بھی گانے کے ٹیزر میں سب کی توجہ حاصل کی۔

اس موقع پر ہدایتکار انویتا دت نے میڈیا سے بات چیت کرتے ہوئے کہا کہ ”کالا ایک ایسی کہانی ہے جسے میں اسکرین پر لانے کے لیے بے چین تھی، یہ اور بھی خوشی کی بات ہے کہ میری فلم نیٹ فلکس پر ریلیز ہو رہی ہے، جس کی رسائی 190 سے زائد ممالک میں ہے۔ ہم سب اس پروجیکٹ کے بارے میں بہت پرجوش ہیں۔”

اس کے ساتھ ہی فلم کے بارے میں بات کرتے ہوئے بابل خان نے کہا کہ میں نے فلم کے اسکرپٹ کے بارے میں جاننے کی کوشش نہیں کی، بس سیدھا آڈیشن کے لیے گیا، اس وقت بابا (عرفان خان) کا انتقال ہوچکا تھا۔

جانے کے بعد بہت ٹوٹا ہوا اور کمزورمحسوس کررہاتھا۔ میں اپنے آپ کو خوش قسمت سمجھتا ہوں کہ مجھے فلم ڈائریکٹر انویتا کے ساتھ اپنے کیریئر کی شروعات کرنے کا موقع ملا۔

قابل ذکر ہے کہ فلم کی کہانی 1930 اور 1940 کی دہائی کے آخر میں ان کے المناک ماضی کے بارے میں بتاتی ہے، یہ کہانی ایک نوجوان فنکار اور مشہور پلے بیک سنگر کی ہے۔

انویتا دت کی ہدایت کاری میں بننے والی اس فلم میں ترپتی ڈمری، بابل خان، سواستیکا مکھرجی، نیر راؤ، اویناش راج شرما اور آشیش سنگھ نے مرکزی کردار ادا کیے ہیں۔ اس فلم کو کلین سلیٹ فلمز کے بینر تلے کرنیش شرما نے پروڈیوس کیا ہے۔

یادرہے کہ عرفان خان کا انتقال 29 اپریل 2020 کو 54 سال کی عمر میں نیورو اینڈوکرائن ٹیومر نامی بیماری کی وجہ سے ہوا تھا۔ عرفان خان کی موت کے بعد سے، بابل اکثر اپنے والد کو سوشل میڈیا پر مداحوں کے ساتھ ان سے متعلق پوسٹس شیئر کرکے یاد کرتے ہیں۔