ہرخاتون کومحفوظ اورقانونی طریقے سے اسقاط حمل کی آزادی حاصل:سپریم کورٹ

نئی دہلی، 29 ستمبر ( انڈیا نیرٹیو)

 سپریم کورٹ نے کہا ہے کہ ہر خاتون کو محفوظ طریقے سے اور قانونی طور پر جنین کو نکالنے کا حق ہے۔ جسٹس ڈی وائی چندرچوڑ کی سربراہی والی بنچ نے کہا کہ20 سے 24 ہفتے کا جنین نکالنے کا حق ہر خاتون کا ہے،  خواہ وہ غیر شادی شدہ ہو یا شادی شدہ۔ غیر شادی شدہ عورت کو بھی اپنے جنین کو محفوظ اور قانونی طور پر نکالنے کا حق حاصل ہے۔

عدالت نے کہا کہ معاشرے میں تبدیلی کے ساتھ قانون مستقل نہیں رہ سکتا۔ایم ٹی پی ایکٹ کی تشریح کرتے ہوئے معاشرے کی حقیقت ظاہر ہونی  چاہیے۔ شادی شدہ اور غیر شادی شدہ خواتین میں کوئی فرق نہیں ہونا چاہیے۔

عدالت نے کہا کہ غیر محفوظ اسقاط حمل سے بچا جا سکتا ہے۔ حاملہ عورت کی ذہنی حالت کا بھی خیال رکھنا چاہیے۔ عدالت نے کہا کہ شادی شدہ عورت بھی عصمت دری کا شکار ہو سکتی ہے۔ وہ اپنے شوہر سے بغیر خواہش کے بنائے گئے  تعلق سے بھی  حاملہ ہو سکتی ہے۔ عدالت نے کہا کہ عصمت دری کو ثابت کرنے کی ضرورت ایم ٹی پی ایکٹ کے مقصد کے خلاف ہوگی۔ عدالت نے کہا کہ پاکسو ایکٹ اور ایم ٹی پی ایکٹ کو ایک ساتھ دیکھنا ہوگا۔