شوبھیندو کی شکایت پرہی مڈ ڈے میل کی تحقیقات کےلئے مرکزی ٹیم بھیجی جا رہی ہے: دھرمیندر پردھان

کولکاتہ ، 14 جنوری (انڈیا نیریٹو)

مرکزی وزیر تعلیم دھرمیندر پردھان نے ہفتے کے روز اعتراف کیا کہ مغربی بنگال کے اسکولوں میں دوپہر کے کھانے میں دھاندلی کی تحقیقات کے لیے پانچ رکنی مرکزی ٹیم بھیجنے کا فیصلہ بنگال کے اپوزیشن لیڈر اور بی جے پی کے سینئر ایم ایل اے شوبھیندو ادھیکاری کی شکایت پر مبنی ہے۔ دھرمیندر پردھان جو ہفتہ کو کولکاتہ پہنچے، ریاستی بی جے پی ہیڈکوارٹر میں میڈیا سے بات کرتے ہوئے ایک سوال کے جواب میں کہا کہ مغربی بنگال میں مڈ ڈے میل اسکیم میں دھاندلی کی بہت سی شکایات مسلسل موصول ہو رہی ہیں۔

تصویروں کے ساتھ خبریں کئی اخبارات میں شائع ہوئیں۔ اس کے علاوہ قائد حزب اختلاف شوبھیندو ادھیکاری نے بھی اس دھاندلی سے متعلق کئی معاملات حکومت ہند کے نوٹس میں لائے۔ انہوں نے اس سے متعلق ثبوت بھی پیش کیے، جس کے بعد مرکزی وزارت تعلیم نے مڈ ڈے میل اسکیم کا مشاہدہ کرنے کے لیے پانچ رکنی ٹیم بھیجنے کا فیصلہ کیا ہے۔ جلد ہی یہ ٹیم بنگال آئے گی اور حالات کا جائزہ لینے کے لیے ہر ضلع کا دورہ کرے گی۔

انہوں نے کہا کہ طلباءکی ذہنی اور جسمانی نشوونما مڈ ڈے میل سے جڑی ہوئی ہے۔ ایسے میں مرکزی حکومت اس معاملے میں کسی بھی قسم کی دھاندلی کو نظر انداز نہیں کر سکتی۔ اس میں اگر تحقیقات کے دوران کسی قسم کی دھاندلی سامنے آئی تو مناسب کارروائی کی جائے گی۔