چین کے مدعے پر پارلیمنٹ میں بحث ضروری: سونیا گاندھی

نئی دہلی، 21 دسمبر (انڈیا نیریٹو)

کانگریس پارلیمانی پارٹی (سی پی پی) کی صدر سونیا گاندھی نے کہا کہ چین کے معاملے پر پارلیمنٹ میں بحث ہونی چاہیے لیکن مرکزی حکومت اس مسئلہ پر ایوان میں بحث نہیں ہونے دے رہی ہے۔ ایسا کرکے حکمران جماعت جمہوریت کا قتل کر رہی ہے۔

سونیا گاندھی نے بدھ کو پارلیمنٹ کے سنٹرل ہال میں پارٹی کے ممبران پارلیمنٹ کی میٹنگ سے خطاب کرتے ہوئے کہا کہ چین کا مسئلہ سنگین قومی تشویش کا معاملہ ہے۔ ایسے معاملے پر پارلیمنٹ میں بحث ہونی چاہیے۔

بی جے پی پر نشانہ لگاتے ہوئے انہوں نے کہا کہ پچھلے کچھ سالوں میں ملک میں نفرت کا ماحول ہے۔ کچھ لوگ معاشرے کو توڑنے کا کام کر رہے ہیں۔ بی جے پی کے دور حکومت میں مہنگائی اور بے روزگاری میں اضافہ ہوا ہے۔ ملک کی سرحد پر بار بار دراندازی ہو رہی ہے۔ انہوں نے کہا کہ حکمران جماعت چین کے معاملے پر جواب نہیں دینا چاہتی۔ جبکہ ایسے وقت میں پارلیمنٹ کو اعتماد میں لے کر کام کیا جائے۔

اس تناظر میں سونیا گاندھی نے مزید کہا کہ ہم بی جے پی حکومت سے پوچھنا چاہتے ہیں کہ وہ چین سے جڑے معاملے پر بات کرنے سے کیوں گریز کر رہی ہے؟ انہوں نے کہا کہ مرکزی حکومت کو بتانا چاہئے کہ چین ہم پر مسلسل حملہ کیوں کر رہا ہے۔ چین کو مستقبل میں مداخلت سے روکنے کے لیے حکومت کی کیا پالیسی ہے؟۔