پانچ ریاستوں میں 31 اکتوبر اور یکم نومبر کو موسلادھار بارش کے آثار

نئی دہلی، 29 اکتوبر (ہ س)۔ ملک کی پانچ ریاستوں میں اکتوبر کی آخری اور نومبر کی پہلی تاریخ کو موسم خراب ہو سکتا ہے۔ محکمہ موسمیات نے 31 اکتوبر اور 1 نومبر کو بارش کا امکان ظاہر کیا ہے۔ محکمہ کے مطابق ان دو دنوں تک جموں و کشمیر، لداخ، تمل ناڈو، کیرالہ اور ہماچل پردیش میں شدید بارش ہو سکتی ہے۔

محکمہ موسمیات کے مطابق ان ریاستوں کے علاوہ دہلی، اتر پردیش، بہار سمیت بیشتر ریاستوں میں موسم خشک رہے گا۔ اتر پردیش میں اب سردی تیزی سے بڑھے گی۔ راجدھانی دہلی میں بھی درجہ حرارت گرے گا۔

اس دوران ملک کی راجدھانی دہلی اور اس کے آس پاس کے علاقوں میں فضائی آلودگی میں مسلسل اضافہ ہو رہا ہے۔ سسٹم آف ایئر کوالٹی، ویدر فورکاسٹنگ اینڈ ریسرچ (سفر) کے تازہ ترین اعداد و شمار کے مطابق دہلی کے کئی علاقوں میں ہوا کا معیار مسلسل خراب ہے۔ انڈیکس بھی نازک زمرے میں پہنچ گیا ہے۔ اے کیو آئی انتہائی خراب درجے میں ہے۔