بھارت نے گجرات فسادات پر بی بی سی کی ڈاکیومنٹری فلم کو پروپیگنڈا قرار دیا

برطانوی ٹیلی ویژن میڈیا بی بی سی کی جانب سے گجرات فسادات پر بنائی گئی ڈاکیومنٹری فلم پر وزارت خارجہ نے سخت ردعمل کا اظہار کرتے ہوئے کہا ہے کہ اس کے پیچھے کوئی نہ کوئی منشا اور ایجنڈا ہے اور یہ استعماری ذہنیت کی عکاس ہے۔

بی بی سی کی ڈاکیومنٹری فلم میں گجرات کے اس وقت کے وزیر اعلیٰ اور موجودہ وزیر اعظم نریندر مودی کو گجرات فسادات کے سلسلے میں مورد الزام ٹھہرایا گیا ہے۔ اس میں برطانیہ کے اس وقت کے وزیر خارجہ جیک اسٹرا کا بیان بھی شامل ہے۔

وزارت خارجہ کے ترجمان ارندم باغچی نے جمعرات کو ایک میڈیا بریفنگ میں کہا کہ یہ ایک پروپیگنڈہ ڈاکیومنٹری فلم ہے اوراس میں ایک گھسی پٹی کہانی کو دہرایا گیا ہے جس میں کوئی صداقت نہیں اور یہ متعصب  ہے۔ انہوں نے کہا کہ ڈاکیومنٹری فلم نوآبادیاتی ذہنیت کا ایک ننگا مظاہرہ ہے۔

ترجمان نے کہا کہ بی بی سی کی ڈاکیومنٹری فلم بھارت میں ٹیلی کاسٹ نہیں ہوئی تاہم اس حوالے سے معلومات برطانیہ میں بھارتی ہائی کمیشن سے موصول ہوئی ہیں۔ جب ترجمان کی توجہ اس جانب مبذول کرائی گئی کہ یہ ڈاکیومنٹری فلم یوٹیوب پر موجود ہے اور اسے ہٹانے کے لیے اقدامات کیے جا رہے ہیں، تو انہوں نے کہا کہ متعلقہ وزارت ضروری دفعات کا جائزہ لے گی۔

انہوں نے کہا کہ اس طرح کی ڈاکیومنٹری فلم بنانے سے اس سے وابستہ افراد اور ایجنسیوں کی شبیہ پر سوالات اٹھتے ہیں۔ ڈاکیومنٹری فلم کے پیچھے کیا مقصد اور ایجنڈا ہے؟ وہ اس پر تبصرہ کرکے غیر ضروری اہمیت نہیں دینا پسند کریں گے۔

ڈاکیومنٹری فلم میں انہوں نے گجرات فسادات کے حوالے سے اس وقت کے برطانوی سکریٹری خارجہ جیک اسٹرا کے بیان اور نئی دہلی میں برطانوی ہائی کمشنر کی مبینہ خفیہ تحقیقاتی رپورٹ کا مذاق اڑایا۔