عالمی مینوفیکچرنگ کو ہندوستان میں لانے کے لئے حکمت عملی بنائیں صنعت کار: سیتا رمن

مغربی ممالک میں کساد بازاری کے خدشے کے پیش نظر ملک میں مینوفیکچرنگ اور سروس سیکٹر میں مواقع بڑھے ہیں۔

نئی دہلی،16دسمبر( انڈیا نیریٹو)

مرکزی وزیر خزانہ نرملا سیتا رمن نے ہندوستانی صنعت پر زور دیا ہے کہ وہ عالمی مینوفیکچرنگ کو ہندوستان میں لانے کی حکمت عملی تیار کرے۔ سیتارامن نے کہا کہ مغرب میں کساد بازاری کے اندیشوں کے درمیان، انہیں ایک حکمت عملی تیار کرنی چاہئے تاکہ ترقی یافتہ ممالک میں کام کرنے والی کمپنیاں ہندوستان کو پیداوار یا خریداری کے مرکز کے طور پر دیکھیں۔

ہم ان صنعتوں سے بھی رابطہ کر رہے ہیں جو ہندوستان آنا چاہتے ہیں

وزیر خزانہ نے یہ بات جمعہ کو فیڈریشن آف انڈین چیمبرز آف کامرس اینڈ انڈسٹری (ایف آئی سی سی آئی) کی 95ویں سالانہ جنرل میٹنگ (اے جی ایم) اور سالانہ کانفرنس میں کہی۔ سیتا رمن نے کہا کہ ہندوستان نے غیر ملکی سرمایہ کاری کو راغب کرنے کے لئے بہت ساری سہولیات فراہم کرنے کے ساتھ ساتھ قوانین میں تبدیلی کی ہے۔ ہم ان صنعتوں سے بھی رابطہ کر رہے ہیں جو ہندوستان آنا چاہتے ہیں۔

سیتارامن نے کہا کہ مغرب میں طویل کساد بازاری نے کمپنیوں کو ہندوستانی بازار کی طرف راغب کیا ہے۔ ہندوستان کو مینوفیکچرنگ اور سروس سیکٹر میں نئے مواقع پر توجہ دینی چاہیے۔ اس کے لیے یہ بہترین وقت ہے۔ انہوں نے صنعتوں سے یہ بھی کہا کہ وہ اسٹارٹ اپ یونٹس کی اختراعات کو دیکھیں اور ان کو بڑھانے کے طریقے پر غور کریں ۔

وزیر خزانہ نے کہا کہ ہندوستان مینوفیکچرنگ اور خدمات کے نئے شعبوں پر توجہ مرکوز کرتا رہے گا۔ جیسا کہ دنیا صاف توانائی کی طرف مائل ہو رہی ہے، گھریلو صنعت کو ترقی یافتہ ممالک کی جانب سے زیادہ ٹیرف کا سامنا کرنا پڑ سکتا ہے۔ سیتا رمن نے کہا کہ ممکنہ کساد بازاری کا اثر یورپ پر بھی پڑے گا۔ اس سے ہندوستانی کمپنیوں کی برآمدات متاثر ہوں گی۔

سیتا رمن نے صنعتوں سے کہا کہ وہ حکومت کو بتائیں کہ موسمیاتی تبدیلی ان پر کیسے اثر انداز ہو رہی ہے۔ اس کے ساتھ وہ اپنی لاگت پر بوجھ کم کرنے کے لیے اقدامات بھی تجویز کریں۔ وزیر خزانہ نے آئندہ بجٹ پر کہا کہ یہ ہندوستان کو اگلے 25 سالوں کے لیے تیار کرنے کے لیے پچھلے چند بجٹ کی روح کے مطابق ہوگا