جموں ،13 جنوری (انڈیا نیریٹو)

جموں و کشمیر کے دورے پر آئے مرکزی وزیر داخلہ امت شاہ نے جموں میں ایک پریس کانفرنس سے خطاب کرتے ہوئے کہا کہ تین ماہ کے اندر سیکورٹی گارڈ کو بڑھانے کا فیصلہ جموں میں اعلیٰ سطحی سیکورٹی جائزہ میٹنگ کے دوران لیا گیا ہے۔

انہوں نے یہ بھی یقین دلایا کہ راجوری دہشت گردوں کے حملے کے متاثرین کی موت کا بدلہ لیا جائے گا۔جموں کے راج بھون میں پریس کانفرنس سے خطاب کرتے ہوئے امت شاہ نے کہا کہ سکیورٹی گارڈ کو تین مہینوں کے اندر بڑھانے کا فیصلہ لیا گیا ہے، انہوں نے مزید کہا کہ میں لوگوں کو یقین دلانا چاہتا ہوں کہ سیکورٹی ایجنسیاں آپ کی حفاظت کو یقینی بنائیں گی۔

راجوری ضلع میں ہوئے دہشت گردانہ حملے کی تحقیقات قومی تحقیقاتی ایجنسی کو سونپ دی گئی ہے

موصوف نے کہا کہ راجوری ضلع میں ہوئے دہشت گردانہ حملے کی تحقیقات قومی تحقیقاتی ایجنسی کو سونپ دی گئی ہے۔ این آئی اے اور جموں پولیس مل کر اس کی تحقیقات کریں گے۔

انہوں نے کہا کہ سی آر پی ایف، جموں و کشمیر پولیس،فوج و دیگر سیکورٹی ایجنسیوں کو اس بات کو یقینی بنانے کی ہدایت دی گئی ہے کہ اس طرح کے واقعات دوبارہ نہ ہوں۔ انہوں نے یہ بھی بتایا کہ دفعہ 370 کی منسوخی کے بعد وادی میں حملوں اور ہلاکتوں کی تعداد میں کمی آئی ہے۔

وزیر داخلہ کا جموں و کشمیر کا دورہ راجوری ضلع میں ہوئے حملوں کے بعد ہوا ہے۔ڈھانگری گاؤں میں دہشت گردوں کے حملے میں دو بچوں سمیت سات افراد جاں بحق اور چودہ دیگر زخمی ہوئے تھے۔وزیر داخلہ نے راجوری حملے میں ہلاک ہونے والوں کے اہل خانہ سے بھی فون پر بات کی اور انہیں یقین دلایا کہ دہشت گردوں کو ڈھونڈ نکالا جائے گا

انہوں نے ولیج ڈیفنس کمیٹیوں کو مضبوط کرنے کا بھی وعدہ کیا۔وزیر داخلہ امت شاہ نے راج بھون میں ایک اعلیٰ سطحی میٹنگ میں سیکورٹی صورتحال کا جائزہ لیا۔ اس میں لیفٹیننٹ گورنر منوج سنہا، چیف سیکرٹری اے کے مہتا، شمالی فوج کے کمانڈر لیفٹیننٹ جنرل اوپیندر دویدی اور ڈائریکٹر جنرل آف پولیس دلباغ سنگھ نے شرکت کی۔