سیاحت سے ملک کی ترقی میں مدد ملے گی: وزیر اعظم نریندرمودی

وزیر اعظم نریندر مودی نے جمعرات کو کہا کہ جدید اور بہتر رابطے سے سیاحت اور تجارت کو سب سے زیادہ فائدہ ہوتا ہے۔ سیاحت کے فروغ سے ملک کی ترقی میں مدد ملے گی۔

وزیر اعظم نے کیرالہ میں اپنے قیام کے دوران آج کوچی میٹرو کے دوسرے مرحلے اور ہندوستانی ریلوے کے تین ریلوے اسٹیشنوں بشمول ایرناکولم جنکشن، ایرناکولم ٹاؤن اور کولم کی تعمیر نو کا سنگ بنیاد رکھا۔

اس موقع پر اپنے خطاب میں وزیر اعظم نے کہا کہ آج کیرالہ کا ہر گوشہ اونم کے مقدس تہوار کی خوشی سے بھرا ہوا ہے۔ جوش و خروش کے اس موقع پر، کیرالہ کو 4600 کروڑ روپے سے زیادہ کے کنیکٹیویٹی پروجیکٹوں کا تحفہ دیا گیا ہے۔

ہم ہندوستانیوں نے، آزادی کے امرت کے آنے والے 25 سالوں میں ایک ترقی یافتہ ہندوستان کی تعمیر کا زبردست عزم کیا ہے۔ ترقی یافتہ ہندوستان کے اس روڈ میپ میں جدید بنیادی ڈھانچہ بڑا کردار ادا کرتا ہے۔

انہوں نے کہا کہ گزشتہ آٹھ سالوں میں مرکزی حکومت نے میٹرو ریل کو شہری ٹرانسپورٹ کا سب سے نمایاں ذریعہ بنانے کے لیے انتھک محنت کی ہے۔ مرکزی حکومت نے میٹرو کو دارالحکومت سے باہر لے جا کر ریاست کے دوسرے بڑے شہروں تک پھیلا دیا ہے۔

وزیراعظم نے مزید کہا کہ ملک میں پہلی میٹرو تقریباً 40 سال قبل چلائی گئی۔ اگلے 30 سالوں میں ملک 250 کلومیٹر کا فاصلہ طے کر چکا ہے۔ اس سے قبل بہت کم میٹرو نیٹ ورک تیار تھا۔ گزشتہ 8 سالوں میں ملک میں 500 کلومیٹر میٹرو بن چکی ہے۔ 1000 کلومیٹر سے زائد کا نیا روٹ تیار کیا گیا ہے۔ ایک سے زائد میٹرو روٹس پر کام جاری ہے۔

انہوں نے کہا کہ ہم ہندوستانی ریلوے کو مکمل طور پر تبدیل کر رہے ہیں۔ آج ملک میں ریلوے اسٹیشن بھی ہوائی اڈوں کی طرح تیار ہو رہے ہیں۔ جدید اور بہتر رابطوں سے سیاحت اور تجارت کو سب سے زیادہ فائدہ ملتا ہے۔ سیاحت ایک ایسی صنعت ہے، جس میں غریب، متوسط طبقہ، گاؤں، شہر، سب شامل ہوتے ہیں، سب کماتے ہیں۔ آزادی کے امرت میں سیاحت کی ترقی سے ملک کی ترقی میں بہت مدد ملے گی۔

وزیر اعظم نے کہا کہ کیرالہ کی خاصیت یہ ہے کہ دیکھ بھال اور فکر یہاں کے معاشرے کی زندگی کا حصہ ہے۔ کچھ دن پہلے مجھے ہریانہ میں ماں امرتا نند مائی جی کے امرتا ہسپتال کا افتتاح کرنے کا موقع ملا۔ مجھے امرتانندمئی امّا کے آشیرواد سے بھی نوازا گیا جو ہمدردی سے بھری ہوئی ہیں۔ آج میں کیرالہ کی مٹی سے ایک بار پھر اظہار تشکر کرتا ہوں۔