ہماچل اسمبلی کی 68 سیٹوں پر ہفتہ کے روز ووٹنگ

۔ 55.92 لاکھ سے زیادہ ووٹر 412 امیدواروں کی قسمت کا فیصلہ کریں گے

شملہ، 12 نومبر (انڈیا نیریٹو)

ہماچل پردیش کی 14ویں اسمبلی کے لیے ہفتہ کو 68 سیٹوں پر پولنگ ہوگی۔ ووٹنگ صبح 8 بجے سے شام 5 بجے تک ہوگی۔ انتخابی میدان میں اترے 412 امیدواروں کے مستقبل کا فیصلہ 55.92 لاکھ ووٹرکریں گے۔ پولنگ کے دن موسم صاف رہنے کی توقع ہے۔ ووٹنگ کی وجہ سے ہفتہ کو ریاست میں عام تعطیل ہوگی۔ ریاست میں 36000 سے زیادہ ووٹروں نے پوسٹل بیلٹ پیپرز کے ذریعے اپنا ووٹ ڈالا ہے۔

اس بار 5592828 ووٹرز اپنا حق رائے دہی استعمال کریں گے۔

چیف الیکٹورل آفیسر منیش گرگ نے بتایا کہ پولنگ پارٹیاں جمعہ کی شام تک تمام 7881 پولنگ اسٹیشنوں پر پہنچ چکی ہیں۔ اس بار 5592828 ووٹرز اپنا حق رائے دہی استعمال کریں گے۔ ان میں 67559 سروس ووٹر، 22 بیرون ملک مقیم ہندوستانی ووٹر، 5525247 عام ووٹر اور 38 تیسری جنس کے ووٹر شامل ہیں۔ پولنگ اسٹیشنز میں سے 7235 دیہی علاقوں میں ہیں جبکہ 646 شہری پولنگ اسٹیشنز کی تعداد 646 ہے۔ سب سے زیادہ 1625 پولنگ اسٹیشن کانگڑا ضلع میں ہیں جبکہ سب سے کم 92 لاہول اسپتی ضلع میں ہیں۔

جن اہم لیڈروں کی قسمت ای وی ایم میں قید ہوگی ان میں وزیر اعلی جے رام ٹھاکر، ان کے نو کابینہ وزرا، قائد حزب اختلاف مکیش اگنی ہوتری، ریاستی کانگریس کے صدر سکھویندر سنگھ سکھو وغیرہ شامل ہیں۔ جمعہ کو بی جے پی، کانگریس اور آزاد امیدواروں سمیت دیگر پارٹیوں کے امیدواروں کے درمیان گھر گھر رابطہ کرنے پر زور دیا گیا۔ تمام امیدوار صبح سے شام تک عوام سے رابطے میں مصروف رہے۔

ریاست کی تمام اسمبلی سیٹوں پر کھلے عام انتخابی مہم جمعرات کو ہی ختم ہو گئی تھی۔ انتخابی مہم کے آخری دن بی جے پی کے قومی صدر جے پی نڈا، مرکزی وزرا امت شاہ اور انوراگ ٹھاکر کے علاوہ بی جے پی کے کئی بڑے لیڈروں نے انتخابی مہم چلائی۔ کانگریس کی جانب سے پرینکا گاندھی نے بھی جلسہ عام سے خطاب کیا۔ قابل ذکر ہے کہ ریاست کی تمام سیٹوں پر ایک ہی مرحلے میں ووٹنگ ہو رہی ہے۔ انتخابات کے نتائج گجرات کے ساتھ 8 دسمبر کو آئیں گے۔ ریاست میں اصل مقابلہ بی جے پی اور کانگریس کے درمیان سمجھا جاتا ہے۔ تاہم کچھ سیٹوں پر عام آدمی پارٹی نے سہ رخی کر دی ہے۔