فوج نے پاکستان اور چین کی سرحد پر نگرانی کے لیے کیوں نصب کیا ریڈار؟

  بلندیوں پر تعینات فوجیوں سے مواصلاتی نظام کی اسکیننگ میں بہتری آئے گی

  نئی دہلی، 06 فروری (انڈیا نیرٹیو)

 ہندوستانی فوج نے پاکستان اور چین کی سرحدوں کے پہاڑی علاقوں میں بیٹل فیلڈ سرویلانس ریڈار-شارٹ رینج (بی ایف ایس آر ۔ایس آر) کو تعینات کیا ہے۔ اس سے اونچائی پر تعینات فوجیوں کے ساتھ ساتھ اونچی رکاوٹوں والے جنگل کے ساتھ ساتھ بڑی عمارتوں والے شہری ماحول میں مواصلاتی نظام کی اسکیننگ کو بہتر بنایا جائے گا۔

 ڈیفنس ریسرچ اینڈ ڈیولپمنٹ آرگنائزیشن (ڈی آرڈی او) نے تمام  موسم میں دشمن سے تحفظ کے لئے انتہائی جدید ،ہلکا،  مین پورٹیبل بیٹری سے چلنے والا الیکٹرانک شارٹ رینج جنگی میدان کی نگرانی کے ریڈاربی ایف ایس آر۔ایس آر تیار کیا ہے۔

یہ ریڈار متعدد اہداف کو بیک وقت اسکین کرتے ہوئے ٹریک کرنے کی صلاحیت رکھتا ہے۔ یہ ریڈار حرکت پذیر اہداف کا پتہ لگانے، ٹریک کرنے اور درجہ بندی کرنے میں مدد کرتا ہے۔

 ریڈار کسی بھی ہلکی گاڑی پر لگایا جا سکتا ہے۔ فوج کے علاوہ یہ نیم فوجی دستوں کے لیے بھی ایک ممکنہ سینسر ہے۔ بی ایف ایس آر کو ہندوستانی سرحدی علاقوں بالخصوص جموں و کشمیر میں لائن آف کنٹرول (ایل او سی) کے ساتھ دراندازی کو روکنے کے لیے تعینات کیا گیا ہے۔

یہ  700 میٹر کے فاصلے پر رینگتے ہوئے آدمی، 3 کلومیٹر کے فاصلے پر چلنے والے آدمی،   7 کلومیٹر کے فاصلے پر  گروپ پلاٹون، 10 کلومیٹر کے فاصلے پر ایل ایس وی جبکہ   14 کلومیٹر کے فاصلے پر  بھاری گاڑی کا پتہ لگا سکتا ہے ۔  اس وقت بھارتی فوج ان میں سے 1100 سے زیادہ ریڈار استعمال کر رہی ہے۔