آزادی کے بعد ہندوستان کو محفوظ رکھنے میں جوانوں نے اہم رول ادا کیا: راجناتھ

آرمی فلیگ ڈے کی کارپوریٹ سماجی ذمہ داری (سی ایس آر) کانفرنس سے خطاب

مصیبت کے وقت سابق فوجیوں اور زیر کفالت خاندانوں کی مدد کرنا ہمارا شہری فرض

آزادی کے بعد ہمارے فوجیوں نے ہندوستان کو محفوظ رکھنے میں اہم کردار ادا کیا ہے۔ ہندوستان کی سالمیت اور خودمختاری کے لیے لڑی گئی تمام جنگوں اور سرحد پار دہشت گردانہ سرگرمیوں میں مسلح افواج نے چیلنجوں کا بھرپور جواب دیا ہے۔

بہت سے بہادروں نے عظیم قربانی دی اور بہت سے سپاہی جسمانی طور پر معذور ہو گئے۔ ان میں سے بہت سے اپنے خاندان کے واحد کفیل تھے۔ خاندان کے سربراہ کی موت یا جسمانی معذوری کی صورت میں خاندانوں کی حالت کا تصور کرنا مشکل ہے۔

وزیر دفاع راج ناتھ سنگھ نے منگل کو مسلح افواج کے پرچم دن کارپوریٹ سماجی ذمہ داری (CSR) کنکلیو کے چوتھے ایڈیشن سے خطاب کیا جو ملک کی سلامتی کے لیے سرحدوں پر تعینات فوجیوں اور ان کے اہل خانہ کے جذبے پرمبنی ہے۔

قومی سلامتی کے مسئلہ پر زور دیتے ہوئے وزیر دفاع نے کیندریہ سینک بورڈ کے زیر اہتمام منعقدہ ایک کانفرنس میں مہمان خصوصی کی حیثیت سے کہا کہ بہت سے ادارے سرمایہ لگاتے وقت قومی سلامتی کا خیال نہیں رکھتے جب کہ یہ سب سے اہم ہے۔ انہوں نے مطالبہ کیا کہ سرمایہ کاری، انسانی وسائل، ٹیکنالوجی کی ترقی کے ساتھ ساتھ ملک کی سرحدوں کی حفاظت کے لیے علیحدہ بجٹ مختص کیا جائے۔

وزیر دفاع نے کہا کہ سرمایہ کاری میں ہر قسم کے خطرات کا اندازہ لگاتے ہوئے یہ بات بھی ذہن میں رکھنی چاہیے کہ کوئی ہمارے ملک پر ٹیڑھی نظر تو نہیں رکھ رہا، جس کی وجہ سے ہماری سرمایہ کاری متاثر ہو سکتی ہے۔