زندگی کو بہادری سے جینے کا درس دیتی داستان حیات:جی دار

تبصرہ نگار: شاہ رخ گل، سیالکوٹ

چند روز قبل ذوالفقار علی بخاری کی دو کتب’’ قسمت کی دیوی ‘‘ اور’’ جی دار ‘‘ موصول ہوئیں۔ پہلی فرصت میں ان کی داستان حیات ’’جی دار ‘‘ پڑھنے کا سوچا گیا۔ جیسے ہی کتاب پڑھنا شروع کی چند ہی صفحات پر بس ہوگئی اور مجھے لگا:

’’ جی دار پڑھنے کے لیے جی دار ہونا ضروری ہے ‘‘

پھر تھوڑی تھوڑی جی داری دکھاتے ہوئے کتاب پھر سے پڑھنا شروع کی۔  مصنف نے اپنی زندگی کے تجربات، حالات و واقعات کو بڑے ہی سادہ اور آسان الفاظ میں بیان کیا ہے. لیکن کچھ اہم معاملات جن پر آپ یا میں بہت کم بات کرنا پسند کرتے ہیں۔

جیسے کہ والدین کے ساتھ تعلقات….. بیٹیوں کے حقوق…… بچوں کی پسند و ناپسند کی شادی…..

اس دور میں ان موضوعات پر کھل کر بات کرنے کی اشد ضرورت ہے اور اس کے ساتھ ساتھ ہم میں سے بہت سے لوگ ایسے ہیں جو اکثر یہ سوچتے ہیں کہ ان کے ساتھ بہت برا ہو رہا ہے اور بہت سے لوگ تو حالات سے دلبرداشتہ ہوکر زندگی کی بازی تک ہار جاتے ہیں۔

ذوالفقار علی بخاری صاحب نے اپنی نجی زندگی ( جس پر بڑے بڑے لوگ لکھنے سے کتراتے ہیں.) و ادبی سفر کے بارے میں لکھ کر بہت سے لوگوں کو بتایا ہے کہ دیکھو یہ جو تمھارے ساتھ ہورہا ہے اور بہت سے لوگوں کے ساتھ بھی ہوتا ہے۔ تم اکیلے نہیں ہو جسے مشکلات کا سامنا کرنا پڑ رہا ہے۔

ویسے میرا خیال ہے ہم سب کی کہانیاں ایک جیسی ہی ہوتی ہیں بس اس میں حادثے اور کردار بدل جاتے ہیں۔

تو مصنف نے اپنی زندگی کے بارے میں سچائی لکھتے ہوئے بہت سے لوگوں کو پیغام دیا ہے کہ کبھی بھی ہمت مت ہارو۔ کوشش کرتے رہو. بلاشبہ قرآن مجید میں اللہ تعالیٰ ارشاد فرماتے ہیں:

اور انسان کو وہی ملے گا جس کی اس نے کوشش کی ہے:سورہ نجم، آیت نمبر39۔

 انسانی سعی کی جس نتیجہ خیزی او ربار آوری کا اس آیت میں اظہار کیا گیا ہے، وہ ایک حوصلہ افزا اور حیات بخش پیغام ہے اور مصنف نے اپنی داستان حیات میں اسی کا درس دیا ہے۔

اگر آپ اپنی زندگی کے مشکل ترین دور سے گزر رہے ہیں اور آپ کو لگتا ہے کہ ہر طرف اندھیرا ہی اندھیرہ ہے۔ تو میرا مشورہ ہے کہ آپ کو ایک بار’’ جی دار ‘‘ ضرور پڑھنی چاہیے۔

آپ محض 600روپے میں گھر بیٹھے ڈاک کا پتہ اور رقم ایزی پیسہ نمبر 03425088675 پر بھیج کر منگوا سکتے ہیں۔