اردو اور پنجابی زبان کے مشہور شاعر’اعزاز احمد آذر‘کو آپ کیسے جانتے ہیں؟

پیش کش : اعجاز زیڈ ایچ

نام اعزاز احمد اور تخلص آذرؔ ہے۔ 25؍دسمبر 1942 کو بٹالہ، (بھارت) میں پیدا ہوئے۔تقسیم ہند کے بعد پاکستان آگئے۔ پنجاب یونیورسٹی سے ایم اے (اردو) ،ایم اے (پنجابی) اور ایم اے (سیاسیات) کے علاوہ ایجوکیشن اور قانون کی ڈگریاں حاصل کیں۔کچھ عرصہ شعبہ تدریس سے اور کچھ عرصہ وکالت سے منسلک رہنے کے بعد 1974 میں وزارت اطلاعات ونشریات کے ذیلی محکمے پاکستان نیشنل سینٹر میں بطور ریذیڈنٹ ڈائرکٹر کے منصب پر فائز رہے۔ بعدازاں بحیثیت ڈپٹی ڈائرکٹر جنرل اسی محکمے سے وابستہ رہے۔ یہ اردو کے علاوہ پنجابی میں بھی شاعری کرتے ہیں ۔16؍مئی 2015ء کو اعزاز احمد آذرؔ انتقال کر گئے ۔

ان کی تصانیف کے نام یہ ہیں

دھیان کی سیڑھیاں (نظمیں ، غزلیں)، محبت شعلہ تھی (نظمیں اور گیت)، تتلی ، پھول اور چاند (بچوں کے لیے نظمیں اور گیت)،دھوپ کا گلابی رنگ۔

بحوالۂ:پیمانۂ غزل(جلد دوم)،محمد شمس الحق،صفحہ:365

معروف شاعر اعزاز احمد آذرؔ کے یومِ وفات پر منتخب کلام بطورِ خراجِ عقیدت

درختِ جاں پر عذاب رُت تھی نہ برگ جاگے نہ پھول آئے

بہار وادی سے جتنے پنچھی ادھر کو آئے ملول آئے

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

نشاطِ منزل نہیں تو ان کو کوئی سا اجرِ سفر ہی دے دو

وہ رہ نوردِ رہِ جنوں جو پہن کے راہوں کی دھول آئے

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

وہ ساری خوشیاں جو اس نے چاہیں اُٹھا کے جھولی میں اپنی رکھ لیں

ہمارے حصّے میں عذر آئے، جواز آئے ، اصول آئے

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

اب ایسے قصّے سے فائدہ کیا کہ کون کتنا وفا نِگر تھا

جب اُس کی محفل سے آگئے اور ساری باتیں ہیں بھول آئے

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

وفا کی نگری لُٹی تو اس کے اثاثوں کا بھی حساب ٹھہرا

کسی کے حصّے میں زخم آئے، کسی کے حصّے میں پھول آئے

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

بنامِ فصلِ بہار آذرؔ وہ زرد پتے ہی معتبر تھے

جو ہنس کے رزقِ خزاں ہوئے ہیں جو سبز شاخوں پہ جھول آئے