ٹی20  ورلڈ کپ: جنوبی افریقہ نے بھارت کو پانچ وکٹوں سے دی شکست

جنوبی افریقہ نے اتوار کو ٹی ٹوئنٹی ورلڈ کپ میں ہندوستانی ٹیم کو پانچ وکٹوں سے شکست دے دی۔ بھارت نے پہلے بیٹنگ کرتے ہوئے 20 اوور  میں نو وکٹ پر 133 رن بنائے۔

جواب میں جنوبی افریقہ کی ٹیم نے 19.4 اوور میں پانچ وکٹوں پر 137 رن بنائے اور میچ جیت لیا۔ اس جیت کے ساتھ جنوبی افریقہ سپر 12 کے گروپ-2 میں پانچ پوائنٹس کے ساتھ ٹاپ پر پہنچ گیا ہے جبکہ ہندوستانی ٹیم دوسرے نمبر پر کھسک گئی ہے۔

جیت کے لیے 134 رن کے ہدف کے تعاقب میں جنوبی افریقہ کی شروعات اچھی نہیں رہی۔ ان کی پہلی تین وکٹیں پاور پلے کے دوران ہی گریں۔ ٹیم 10 اوور  میں 40 رن تک پہنچی۔ اس کے بعد ایڈن مارکرم اور ڈیوڈ ملر نے مل کر ٹیم کو مشکل سے نکالا۔

مارکرم نے اس دوران اپنی نصف سنچری اسکور کی۔ تاہم وہ اپنی اننگ جاری نہ رکھ سکے۔ انہیں 16ویں اوور میں ہاردک پانڈیا نے آؤٹ کیا۔ مارکرم نے 41 گیندوں میں 52 رن بنائے۔ اس کے بعد ڈیوڈ ملر نے بھی اپنی نصف سنچری اسکور کی اور ٹیم کو چوکے سے فتح دلائی۔ ملر 46 گیندوں پر 59 رن بنا کر ناٹ آؤٹ رہے۔

ہندوستان کی جانب سے ارشدیپ سنگھ نے دو وکٹیں حاصل کیں جبکہ محمد سمیع، ہاردک پانڈیا اور روی چندرن اشون نے بالترتیب ایک ایک وکٹ حاصل کی۔

اس سے قبل ٹاس جیت کر پہلے بیٹنگ کرتے ہوئے ہندوستانی ٹیم نے سوریہ کمار یادو کی 40 گیندوں میں چھ چوکوں اور تین چھکوں کی مدد سے 68 رن کی شاندار اننگ کی بدولت نو وکٹ پر 133 رن بنائے۔ سوریہ کمار کے علاوہ کوئی اور بلے باز کچھ خاص نہیں کر سکا۔

جنوبی افریقہ کی جانب سے لونگی اینگیڈی نے چار وکٹیں حاصل کیں جبکہ وین پارنیل نے تین اور اینریک نورٹجے نے ایک وکٹ حاصل کی۔