امریکہ نے آسمان پر ایک اور مشکوک چیز کو مار گرایا

واشنگٹن، 13 فروری (انڈیا نیریٹو)

امریکہ نے اتوار کو اپنی فضائی حدود میں نظر آنے والی ایک اور نامعلوم چیز کو مار گرایا۔ ایک دن پہلے ہفتے کے روز، امریکہ نے کناڈا کے اوپر نظر آنے والی اسی طرح کی ‘سلنڈریکل’ چیز کو مار گرایا تھا۔

امریکی محکمہ دفاع کے ہیڈکوارٹر پینٹاگون کے پریس سکریٹری بریگیڈیئر جنرل پیٹ رائڈر نے بتایا کہ صدر جو بائیڈن کی ہدایت پر ایف-16 جنگی طیارے نے ریاست مشی گن میں جھیل ہورون کے اوپر امریکی فضائی حدودمیں تقریباً 20000 فٹ کی بلندی پر پرواز کرنے والی چیز کو مار گرانے کے لئے اے آئی ایم 9ایکس سے حملہ کیا۔ اے آئی ایم 9 ایکس ہدف کو نشانہ بنانے میں کامیاب رہا۔

گزشتہ ہفتے جنوبی کیرولائنا کے ساحل سے دور بحر اوقیانوس میں چینی جاسوس غبارے کو مار گرائے جانے کے بعد، ایک ہفتے میں کسی نامعلوم ہوائی چیز کے مار گرائے جانے کا یہ تیسرا واقعہ ہے۔ امریکی جنگی طیاروں نے جمعہ کو الاسکا اور ہفتے کے روز کناڈا کی فضائی حدود میں ایسی ہی نامعلوم چیز کو نشانہ بنایا ہے۔

امریکی صدر بائیڈن نے اتوار کو وزیر دفاع لائیڈ آسٹن کی سفارش پر ہوائی جہاز کو مار گرانے کا حکم دیا۔ پینٹاگون نے کہا کہ اس چیز کو مار گرانے کے لیے ایسی جگہ کا انتخاب کیا گیا تاکہ زمین پر موجود لوگوں کو کوئی نقصان نہ پہنچے۔