مصر اور ترکیہ کے درمیان ایک دہائی کے بعد سفارتی تعلقات بحال

انقرہ،05جولائی(انڈیا نیرٹیو)

مصر اور ترکیہ نے ایک عشرے کے بعد باضابطہ طور پر سفارتی تعلقات بحال کر لیے ہیں اور ایک دوسرے کے دارالحکومتوں میں سفیروں کا تقرر کردیا ہے۔

دونوں ممالک کے وزراء  خارجہ نے ایک مشترکہ بیان میں کہا ہے کہ عمرو الہمامی انقرہ میں مصر کے سفیر ہوں گے جبکہ ترکی نے صالح متلو سین کو قاہرہ میں اپنا سفیر مقرر کیا ہے۔

ترک وزیر خارجہ حقان فیدان نے اس اعلان کے بعد ایک نیوزکانفرنس میں کہا کہ ’’یہ تقرر تعلقات کو معمول پر لانے میں ایک اہم سنگ میل کی حیثیت رکھتے ہیں۔اب سے ہمارے تعلقات سیاسی، اقتصادی اور دیگر تمام شعبوں میں تیزی سے بہتر ہوتے رہیں گے۔ یہ ہمارے صدر اور حکومت کی خواہش ہے‘‘۔

دونوں ممالک کے درمیان تعلقات 2013 میں اس وقت خراب ہوئے تھے جب مصر کے آرمی چیف جنرل عبدالفتاح السیسی نے الاخوان المسلمون کے منتخب صدر محمد مرسی کو اقتدار سے بے دخل کردیا تھا۔اس وقت مصر نے ترکیہ کے سفیر کو ملک بدر کر دیا تھااور انقرہ پر الزام عاید کیا تھا کہ وہ ان تنظیموں کی پشت پناہی کر رہا ہے جو ملک کو کمزور کرنے پر تلی ہوئی ہیں۔

اس کے بعد سے قاہرہ میں ترکیہ کا سفیر تعینات نہیں تھا۔مصری صدر عبدالفتاح السیسی نے اپنے ترک ہم منصب رجب طیب ایردوآن کے ساتھ مئی میں ملاقات میں دوطرفہ سفارتی تعلقات بحال کرنے سے اتفاق کیا تھا۔

انقرہ اور قاہرہ میں دونوں ملکوں کے سینئر حکام کے درمیان سفارتی تعلقات کی بحالی کے لیے مشاورت 2021 میں شروع ہوئی تھی اور اس وقت ترکیہ مصر، متحدہ عرب امارات، اسرائیل اور سعودی عرب کے ساتھ تعلقات بہتر بنانے کا خواہاں تھا۔