عمران خان کو خاتون جج کو دھمکی دینے کے معاملہ میں طلب کیا

اسلام آباد۔18؍ جنوری(انڈیا نیریٹو)

اسلام آباد کی ایک ضلعی اور سیشن عدالت نے بدھ کو سابق وزیراعظم اور پاکستان تحریک انصاف (پی ٹی آئی( کے چیئرمین عمران خان کو خاتون جج کے خلاف ’دھمکی آمیز‘ ریمارکس سے متعلق کیس میں طلب کرلیا۔

عمران خان، جنہیں آج ذاتی طور پر عدالت میں پیش ہونے کا کہا گیا تھا، آج کی سماعت کو نظر انداز کر دیا، جب کہ ان کے جونیئر وکیل سردار مسروف عدالت میں پیش ہوئے۔سینئر جج رانا مجید کے رخصت ہونے کے باعث سماعت 24 جنوری تک ملتوی کر دی گئی۔ پی ٹی آئی چیئرمین عمران خان کو آئندہ سماعت پر عدالت میں حاضری یقینی بنانے کی ہدایت کی گئی ہے۔

عمران خان کے خلاف 20 اگست کو اسلام آباد میں اپنی تقریر میں توہین آمیز زبان استعمال کرنے اور ایڈیشنل سیشن جج زیبا چوہدری کو دھمکیاں دینے کے الزام میں تھانہ مارگلہ میں دہشت گردی کا مقدمہ درج کیا گیا تھا۔تاہم، اسلام آباد ہائی کورٹ نے 19 ستمبر کو خاتون جج اور اسلام آباد پولیس کے اہلکاروں کو دھمکیاں دینے پر پی ٹی آئی سربراہ کے خلاف درج مقدمے سے دہشت گردی کی دفعات ہٹانے کا حکم دیا۔