ہندوستان۔مصر دوطرفہ تعاون کو اسٹریٹجک پارٹنرشپ تک بڑھانے کے لیے پانچ معاہدوں پر دستخط

وزیر اعظم نریندر مودی اور مصری صدر عبدالفتاح السیسی نے بدھ کو دو طرفہ اور وفود کی سطح پر بات چیت کی۔ اس دوران دونوں ممالک نے باہمی تعلقات کو اسٹریٹجک پارٹنرشپ کی سطح پر لے جانے کا اعلان کیا۔

ہندوستان۔مصر نے اگلے پانچ سالوں میں دو طرفہ تجارت کو 12 بلین امریکی ڈالر تک لے جانے کا بھی فیصلہ کیا۔ دونوں ممالک کے درمیان پانچ معاہدوں پر دستخط ہوئے۔ دونوں ممالک دو طرفہ سفارتی تعلقات کے قیام کے 75 سال بھی منا رہے ہیں۔ اس موقع پر ایک ڈاک ٹکٹ بھی جاری کیا گیا۔

وزیر اعظم اور دورے پر آئے مہمان رہنما نے دہلی کے حیدرآباد ہاؤس میں ملاقات کی۔ اس کے بعد دونوں رہنماؤں نے اپنے وفود کی قیادت کی اور بات چیت کی۔ اس دوران سیاسی اور سیکورٹی تعاون ، اقتصادی روابط اور سائنسی تعاون ، ثقافتی اور عوام سے عوام کے رابطے اور علاقائی اور عالمی ترقی پر تبادلہ خیال کیا گیا۔

دونوں فریقوں نے کثیر الجہتی فورموں بالخصوص جی 20 میں تعاون پر بھی تبادلہ خیال کیا۔ مصر ایک مہمان ملک کے طور پر جی20 میں شامل ہونے والا ہے۔ اس دوران مصر ترقی پذیر ممالک کے لیے ہندوستان کی پہل، وائس آف دی گلوبل ساؤتھ، کو جی20 مباحثوں میں لے جانے کی ہندوستان کی کوششوں میں شامل ہوگا۔

دو طرفہ بات چیت کے بعد دونوں رہنماؤں نے حیدرآباد ہاؤس میں مشترکہ پریس بیان دیا۔ اس میں وزیر اعظم نے سیاسی ، سیکورٹی ، دفاع ، توانائی اور اقتصادی شعبوں کا احاطہ کرتے ہوئے، ہندوستان-مصر تعلقات کو اسٹریٹجک شراکت داری میں اپ گریڈ کرنے کا اعلان کیا۔

ہندوستان اور مصر نے دونوں رہنماؤں کی موجودگی میں سائبر سیکورٹی ، ثقافت ، انفارمیشن ٹیکنالوجی ، نوجوانوں کے امور میں تعاون اور نشریات کے شعبوں میں مفاہمت ناموں کا تبادلہ کیا۔