برکس کی توسیع پر اختلاف رائے کی خبریں بے بنیاد: ہندوستان

وزارت خارجہ نے میڈیا رپورٹس کی تردید کی ہے کہ ہندوستان کو برکس تنظیم کی توسیع کے حوالے سے کچھ اختلافات ہیں۔ انہوں نے کہا کہ ایسی خبریں بے بنیاد ہیں۔

برکس کی توسیع کے حوالے سے ہندوستان کے موقف کا اعادہ کرتے ہوئے وزارت خارجہ کے ترجمان ارندم باغچی نے ہفتہ وار پریس کانفرنس میں کہا کہ اس کے لیے ہم نے رہنما اصولوں، معیارات اور اہلیت اور عمل کے بارے میں مشاورت اور اتفاق رائے کی بنیاد پر فیصلہ کیا ہے۔ ترجمان نے وزیر خارجہ ایس جے شنکر کے اس بیان کا حوالہ دیا کہ ہندوستان برکس کی توسیع کے بارے میں کھلے ذہن اور مثبت ہے۔

ترجمان نے وزیر اعظم نریندر مودی کے جنوبی افریقہ سے جوہانسبرگ میں منعقد ہونے والے برکس سربراہی اجلاس میں براہ راست حصہ لینے کے بجائے ویڈیو کانفرنسنگ کے ذریعے شرکت کی خبروں کو قیاس آرائی قرار دیا۔ انہوں نے کہا کہ اس طرح کے اعلیٰ سطحی دورے کے بارے میں جلد از جلد معلومات فراہم کی جائیں گی۔

قابل ذکر ہے کہ مغربی میڈیا میں خبریں شائع ہوئی تھیں کہ ہندوستان برکس تنظیم کی توسیع پر متفق نہیں ہے۔ ان رپورٹس میں یہ بھی کہا گیا کہ وزیر اعظم مودی جوہانسبرگ جانے کے بجائے ویڈیو لنک کے ذریعے چوٹی کانفرنس میں شرکت کریں گے۔

برکس تنظیم میں ہندوستان کے علاوہ برازیل، روس، چین اور جنوبی افریقہ شامل ہیں۔ دنیا کے کئی ممالک نے برکس تنظیم میں شمولیت کی خواہش ظاہر کی ہے۔ ماضی میں، برکس وزرائے خارجہ نے نئے اراکین کی شمولیت کے حوالے سے ضروری رہنما خطوط اور اہلیت کا فیصلہ کیا ہے، جو سربراہی اجلاس کے دوران اعلیٰ رہنماؤں کے سامنے رکھے جائیں گے۔