عمران کے گھر پر پولیس کی بربریت ریاستی دہشت گردی ہے:پی ٹی آئی

لاہور ، 19 مارچ (انڈیا نیرٹیو)

 پاکستان تحریک انصاف (پی ٹی آئی) نے 24 گھنٹے قبل سابق وزیراعظم عمران خان کی رہائش گاہ زمان پارک میں پولیس کے بربریت کی شدید مذمت کرتے ہوئے اسے ریاستی دہشت گردی قرار دیاہے۔ یہاں کے معروف اخبار ڈان نے پی ٹی آئی رہنما فواد چوہدری کے حوالے سے ہفتہ کو زمان پارک میں پیش آنے والے پورے واقعے کے بارے میں اپنی ویب سائٹ پر ایک تفصیلی رپورٹ نشر کی۔

فواد چوہدری نے الزام لگایا ہے کہ یہ سب مسلم لیگ ن کی رہنما مریم نواز کے کہنے پر کیا گیا۔ یہ امر قابل ذکر ہے کہ عمران خان کے اسلام آباد روانہ ہونے کے بعد سیکڑوں پولیس اہلکار داخل ہوئے تھے۔ عمران خان کی بہن ڈاکٹر عظمیٰ خانم نے دعویٰ کیا ہے کہ پولیس بغیر وارنٹ کے ان کی رہائش گاہ میں داخل ہوئی۔

پولیس نے گھر میں موجود خواتین اور نوکروں کو ہراساں کیا۔ پولیس نے عدالتی حکم کی خلاف ورزی کی۔توشہ خانہ کیس کے سلسلے میں عمران خان کو کل اسلام آباد کی عدالت میں پیش ہونا تھا۔ عدالت کے احاطے کے باہر حاضری لگانے کے بعد واپس جانے کی اجازت دے دی گئی۔

قبل ازیں عدالت کے احاطے کے باہر خان کے حامیوں اور سکیورٹی اہلکاروں کے درمیان تصادم ہوا۔پی ٹی آئی رہنماؤں کا دعویٰ ہے کہ عمران خان جیسے ہی اسلام آباد روانہ ہوئے، پنجاب پولیس کے 10 ہزار سے زائد اہلکار ان کی رہائش گاہ پر گھس آئے۔ درجنوں حامیوں کو گرفتار کر لیا گیا۔ داخلی راستے پر لگائے گئے خیموں اور رکاوٹوں کو اکھاڑ پھینکا۔ کیمپ میں موجود سینکڑوں حامیوں کو لاٹھی چارج کرکے بھگا دیا گیا۔