روسی صدر پوتن نے یوکرین کے چار مقبوضہ علاقوں میں مارشل لا کا نفاذ کیا

ماسکو،20اکتوبر(انڈیا نیرٹیو)

روس کے صدر ولادیمیرپوتن نے یوکرین کے ضم شدہ چارمقبوضہ علاقوں میں مارشل لا کے نفاذ کا اعلان کیا ہے۔صدرپوتن نے یوکرین کے چارعلاقوں دونتیسک،لوہانسک، کھیرسن اورزاپوریڑڑیا میں گذشتہ ماہ ریفرینڈم منعقد کیا تھا اور اس کے نتائج کی روشنی میں انھیں روسی ریاست میں ضم کرنے کااعلان کیا تھا۔

روسی فوج نے فروری میں یوکرین پر چڑھائی کے بعد ان علاقوں پر قبضہ کرلیا تھا۔کریملن نے پھروہاں اپنے کٹھ پتلی حکام کو مقرر کیا تھامگر مغربی ممالک یوکرین کے ان علاقوں پر روس کی عمل داری کو تسلیم نہیں کرتے ہیں اور وہ انھیں بدستور یوکرین ہی کا حصہ قراردیتے ہیں۔

صدرپوتین نے اپنی سلامتی کونسل کے ارکان سے خطاب میں حکومت کو ہدایت کی کہ وہ وزیر اعظم میخائل میشوسٹن کی سربراہی میں ایک خصوصی رابطہ کونسل قائم کرے تاکہ ماسکو کی جنگی کوششوں کو فروغ دینے کے لیے روس کے ضم شدہ علاقوں کے ساتھ مل کر کام کیا جا سکے۔

کریملن کے شائع کردہ فرمان میں یوکرین سے ملحقہ روس کے آٹھ علاقوں بشمول کریمیا میں”معاشی طورپرمتحرک“ہونے کا حکم دیا گیاہے۔کریمیا پر روس نے 2014 میں حملہ کیا تھا اور اس کو ضم کرلیا تھا۔

صدارتی فرمان میں کہا گیا ہے کہ ان علاقوں کے اندر اور باہر نقل و حرکت کو محدود کردیا جائے گا۔صدر پوتین نے کہا کہ وہ روس کے تمام 80 سے زیادہ علاقوں کے رہنماؤں کو اہم تنصیبات کے تحفظ، امن عامہ کو برقراررکھنے اور ماسکو کے”خصوصی فوجی آپریشن“ کی حمایت میں اضافے کے لیے اضافی اختیارات دے رہے ہیں۔