آرمی چیف کے انتخاب میں نواز سے مشاورت کو لے کرپھنسے شہباز شریف

غداری کا مقدمہ چلانے کا مطالبہ

 پاکستان میں نئے آرمی چیف کی تقرری کا ہنگامہ تھمنے کا نام نہیں لے رہا۔ اب پاکستان کے وزیر اعظم شہباز شریف اس معاملے پر اپنے بھائی اور سابق وزیر اعظم نواز شریف سے مشورہ لینے کے معاملے میں پھنس گئے ہیں۔

پاکستان کی پنجاب اسمبلی نے ایک قرارداد منظور کی ہے جس میں شہباز پر اپنے مفرور بھائی سے مشورہ لینے کا الزام لگایا گیا ہے، اور مطالبہ کیا گیا ہے کہ ان پر بغاوت کے الزامات کے تحت مقدمہ چلایا جائے۔

پاکستان کے موجودہ آرمی چیف جنرل قمر جاوید باجوہ رواں سال نومبر کے آخر میں ریٹائر ہونے والے ہیں۔

پاکستان میں پہلے ہی موجودہ وزیر اعظم شہباز شریف اور سابق وزیر اعظم عمران خان کے درمیان ان کی جگہ نئے آرمی چیف کی تقرری پر رسہ کشی جاری ہے۔ جوکمی تھی شہباز کے دورہ برطانیہ نے پوری کردی ہے۔

درحقیقت شہباز شریف ملکہ برطانیہ الزبتھ دوم کی آخری رسومات میں شرکت کے لیے لندن گئے تھے۔ اس دوران انہوں نے اپنے بھائی اور سابق وزیراعظم نواز شریف سے ملاقات کی اور ان سے اگلے آرمی چیف کی تقرری پر تبادلہ خیال کیا۔

نواز شریف 2019 سے لندن میں مقیم ہیں۔ لندن جانے سے پہلے وہ کرپشن کیس میں پاکستانی جیل میں سزا کاٹ رہے تھے۔ 2019 میں لاہور ہائی کورٹ نے انہیں آٹھ ہفتوں کے لیے لندن جانے کی اجازت کے ساتھ ضمانت دی تھی۔

آٹھ ہفتے بعد واپس نہ آنے پر انہیں مفرور قرار دے دیا گیا۔اب نواز کو مفرور قرار دیے جانے کے باوجود ملک کے آرمی چیف کی تقرری پر ان سے مشاورت کے بعد معاملہ اٹکا ہوا ہے۔

پاکستان کی پنجاب اسمبلی نے اس حوالے سے ایک احتجاجی قرارداد منظور کر لی ہے۔ پنجاب کے وزیر پارلیمانی امور بشارت راجہ نے ایوان میں ایک تحریک پیش کی جس میں وزیراعظم شہباز شریف کے خلاف آئین کے آرٹیکل 6 کے تحت کارروائی کا مطالبہ کیا گیا۔

قرارداد میں کہا گیا ہے کہ وزیراعظم شہباز شریف نے نئے آرمی چیف کی تقرری پر پاکستانی عدالت سے مفرور قرار دیے گئے سابق وزیراعظم نواز شریف سے چند روز قبل لندن میں مشاورت کی تھی۔

ان کا یہ اقدام نہ صرف وزارت عظمیٰ کے حلف کی خلاف ورزی ہے بلکہ انہوں نے ملک کے حساس معاملات کو غیر متعلقہ افراد سے شیئر کرنے کا جرم بھی کیا ہے۔

اس کے ساتھ ان کے اس اقدام کو فوج کی توہین بھی قرار دیا گیا ہے۔ ایوان نے شہباز شریف کے خلاف بغاوت کی دفعات کے تحت مقدمہ چلانے کا مطالبہ کیا ہے۔