پاکستان اور چین سیاسی، سیکورٹی اور اقتصادی تعلقات کو وسعت دینے پر کیوں ہیں متفق؟

اسلام آباد،21؍ مارچ

پاکستان اور چین نے دوطرفہ تعلقات کے تمام پہلوؤں کا جائزہ لیا ہے اور سیاسی اور سیکورٹی تعاون، دوطرفہ تجارت، اقتصادی اور مالیاتی تعاون، ثقافتی تبادلے، سیاحت اور عوام کے درمیان تعلقات کو وسعت دینے اور مضبوط کرنے پر اتفاق کیا ہے۔

پاک چین دوطرفہ سیاسی مشاورت (بی پی سی) کا تیسرا دور بیجنگ میں منعقد ہوا۔ دفتر خارجہ کے ترجمان نے اتوار کو ایک پریس ریلیز میں بتایا کہ سیکرٹری خارجہ ڈاکٹر اسد مجید خان نے پاکستانی وفد کی قیادت کی جبکہ چینی وفد کی قیادت نائب وزیر خارجہ سن ویڈونگ نے کی۔بی پی سی پاکستان اور چین کے درمیان ایک باقاعدہ ادارہ جاتی طریقہ کار ہے۔

چین پاکستان اقتصادی راہداری  کی ایک دہائی کی تکمیل کو نوٹ کرتے ہوئے، دونوں فریقوں نے  سی پیک کے ساتھ اپنے عزم کا اعادہ کیا جو دو طرفہ تعاون کا ایک اہم ستون اور پاکستان اور چین کے درمیان ہمیشہ گہری ہوتی دوستی کی علامت ہے۔ انہوں نے علاقائی روابط اور تعاون کو بڑھانے کے لیے تیسرے فریق کی شرکت سمیت  سی پیک کی توسیع میں مصروف رہنے پر بھی اتفاق کیا۔

پاکستان اور چین اعلیٰ سطح کی مصروفیات اور ڈائیلاگ کے طریقہ کار کو بھی فروغ دیں گے اور مواصلات کے ذرائع کو مزید مضبوط بنائیں گے۔سیکرٹری خارجہ نے 2022 کے تباہ کن سیلاب کے دوران پاکستان کے معاشی استحکام اور انسانی ہمدردی کی بنیاد پر امداد کے لیے چین کی جانب سے مسلسل اور فراخدلانہ تعاون پر شکریہ ادا کیا۔