خوردہ اور تھوک کے کاروبار کو ایم ایس ایم ای میں شامل کیا جائے گا، کریڈٹ سہولت کا فائدہ ملے گا

نئی دہلی، 02 جولائی (انڈیا نیرٹیو)

مائیکرو، چھوٹے اور درمیانے درجے کے کاروباری اداروں (ایم ایس ایم ای) کے وزیر نتن گڈکری نے جمعہ کے روز ایم ایس ایم ای میں خوردہ اور تھوک کی تجارت کو شامل کرنے کا اعلان کیا۔

ایک ٹویٹ میں انہوں نے کہا کہ خوردہ اور تھوک تجارت کو اب تک ایم ایس ایم ای کے دائرہ کار سے دور رکھا گیا تھا، لیکن اب نظرثانی کے بعد اور ریزرو بینک آف انڈیا (آر بی آئی) کے رہنما خطوط کے مطابق خوردہ اور تھوک تجارت کو بھی ترجیحی شعبے کا کریڈٹ دیا جائے گا۔

انہوں نے کہا کہ وزیر اعظم کی سربراہی میں، ہم ایم ایس ایم ای کو مضبوط بنانے اور انہیں معاشی نمو کے انجن بنانے کے لئے پوری طرح پرعزم ہیں۔ گڈکری نے کہا کہ ڈھائی کروڑ خوردہ اور تھوک کے تاجروں کو نظرثانی شدہ رہنما خطوط سے فائدہ ہوگا۔ انہوں نے کہا کہ نظرثانی شدہ رہنما خطوط کی مدد سے اب خوردہ اور تھوک فروشوں کو انٹرپرائز رجسٹریشن پورٹل پر اندراج کی اجازت ہوگی۔