سعودی میڈیا کے مطابق پاکستان، بھارت اور یو اے ای پابندیوں سے مستثنیٰ ممالک میں شامل نہیں

سعودی عرب نے پابندی سے مستثنیٰ ممالک سے زائرین کو ملک میں داخل ہونے کی اجازت دے دی۔وزارت حج و عمرہ کے مطابق آئندہ دنوں میں 20 ہزار سے زائد غیر ملکی زائرین کو عمرے کی اجازت ہوگی۔ترجمان وزارتِ حج و عمرہ نے کہا ہے کہ صرف پابندیوں سے استثنیٰ والے ممالک کے زائرین سعودی عرب آ سکتے ہیں۔سعودی میڈیا کے مطابق پاکستان، بھارت اور یو اے ای پابندیوں سے مستثنیٰ ممالک میں شامل نہیں۔

دوسری جانب سعودی حکومت نے سیاحتی ویزوں کے اہل 49 ممالک کی فہرست جاری کردی، ان ممالک کے شہری 90 دن کے ویزے پر سعودی عرب آسکتے ہیں۔سعودی میڈیا کی رپورٹ کے مطابق سیاحتی ویزے آن لائن الیکٹرانک سسٹم سے جاری ہوں گے۔رپورٹ کے مطابق فہرست میں امریکا، کینیڈا، آسٹریا، بلجیم، برطانیہ اور دیگر ممالک شامل ہیں۔

رپورٹ میں مزید کہا گیا ہے کہ 49 ممالک کی فہرست میں پاکستان، بھارت اور بنگلا دیش شامل نہیں۔سعودی عرب کی منظور شدہ ویکسین لگانے والے سیاحوں کو ملک میں آنے کی اجازت ہوگی۔سعودی حکام کے مطابق ویکسین کی دونوں خوراکیں لگانے والوں کو بغیر قرنطینہ داخلے کی اجازت ہوگی، سیاحوں کو صرف ویکسینیشن سرٹیفیکیٹ دکھانا ہوگا۔