نئی دہلی،19ستمبر (انڈیا نیرٹیو)
آئی پی ایل 2021 کے دوسرے مرحلے کا آغاز آج سے روہت شرما کی زیرقیادت ممبئی انڈینز اور مہندر سنگھ کی زیرقیادت چنئی سپر کنگز کے درمیان میچ سے ہوگا۔ دونوں ٹیموں نے بھارت میں پہلے مرحلے میں شاندار کارکردگی کا مظاہرہ کرتے ہوئے آئی پی ایل کے پوائنٹس ٹیبل میں ٹاپ چار ٹیموں میں جگہ بنا لی ہے۔ ان دونوں ٹیموں کے علاوہ دہلی کیپیٹلز اور رائل چیلنجرز بنگلور بھی مضبوطی کے ساتھ پلے آف میں جگہ بناتے ہوئے نظر آرہے ہیں۔ تاہم، دوسرے مرحلے کے آغاز سے پہلے، کچھ ایسی ٹیمیں ہیں، جن کے پلے آف میں جانے کے امکانات بہت کم ہیں۔ آئیے ان پر ایک نظر ڈالتے ہیں۔
آئی پی ایل 2021 کے پہلے مرحلے میں ڈیوڈ وارنر کی قیادت میں کھیلنے والے سن رائزرز حیدرآباد کے لیے آگے کا سفر آسان نہیں ہے۔ حیدرآباد اس وقت سات میں سے چھ میں شکست کے بعد صرف دو پوائنٹس کے ساتھ پوائنٹس ٹیبل میں آٹھویں نمبر پر ہے۔ اب ان کے گروپ مرحلے میں سات میچ باقی ہیں اور پلے آف میں جگہ پانے کے لیے کم از کم چھ میچ جیتنے کی ضرورت ہے۔ یہی نہیں، نئے کپتان کین ولیم سن کی قیادت میں ٹیم کو بہت سے میچز بڑے مارجن سے جیتنے ہوں گے کیونکہ ان کا نیٹ رن ریٹ بھی بہت خراب ہے۔
حیدرآباد کے علاوہ، ایون مورگن کی زیرقیادت اور دو مرتبہ کی چمپئن کولکاتہ نائٹ رائیڈرس بھی پوائنٹس ٹیبل کی انتہائی نچلی ٹیموں میں شامل ہیں۔ آئی پی ایل 2021 کے پہلے مرحلے میں ٹیم کو مایوسی ہوئی اور ٹیم سات میں سے پانچ میچ ہار چکی ہے، جس کی وجہ سے وہ فی الحال پوائنٹس ٹیبل میں 4 پوائنٹس کے ساتھ ساتویں مقام پر ہے۔ ان کے پاس مزید سات میچ کھیلنے ہیں اور پلے آف میں پہنچنے کے لیے کم از کم پانچ میچوں کو بھاری مارجن سے جیتنا ہوگا۔
